美股一如所料，周一急跌逾300點，但港股噚日跌至9000點邊緣，即刻有支持反彈，恒生指數最後收報9062，跌46點，成交額53.98億元。
其實撇開美伊戰事因素，單係肺炎事件已影響零售及旅遊業務，上半年香港經濟若保持不跌已算難得。阿虎擔心肺炎事件短期內不能解決，對港股構成一定壓力。至於乜嘢股最受害，唔使講都係酒店股，大酒店（045）及香格里拉（069）股價仍企穩，但恐怕捱唔到好耐。唔少大行開始研究肺炎事件嘅影響，分析員向酒店集團攞4月份訂房數字，發現好多酒店都跌咗35%至40%，因此就快有報告叫客沽酒店股。航空股一樣受影響，國泰航空（293）噚日跌2%，收11.15元，暫不宜沾手。
剛公布業績嘅超大農業（682）噚日玩插水，急跌34%，收報0.86元，成交額1.42億元，排名第8大成交。據e莉莎打聽，原來有一批揸貨好耐嘅基金客，見到業績唔對路，擔心係歐亞（932）翻版，唔計價咁沽貨，但大陸炒家亦不示弱，低位仍肯接貨，幕後人拍晒心口話未有咁快玩完，但阿虎相信玩呢隻股，要預咗坐過山車。
油價攀升，加上眾多石油化工股今日起陸續公布業績，有歐資大行乘機推出報告，提高對油股嘅評級。佢哋最睇好唔係3大油股，而係上海石化（338）及北京燕化（325）。呢間大行可說係無寶不落，背後嘅歐資基金客實力雄厚，所以兩股皆可留意。
另外，利豐（494）業績佳，股價則已反映。老友報料叫不妨吼隻「小利豐」林麥（915），因為公司繼續積極同芬佬做騷，相信好事將近。
阿虎