最近，亞Mark身邊有個資深老Sales同我講，話自1997年經濟泡沫爆破以來，佢都未試過近期咁慘淡嘅境況；自財爺預算案推出至今，都只係做成一單新車交易咋！查實，亞Mark身邊呢位朋友都算幸運，皆因近期香港個車市好似深水炸彈咁，只有愈沉愈深，重係無晒活力嗰隻㖭！一般代理車行最勁都不過簽成十單八單新車買賣，而佔上大半數重無晒交投，你話班只有一、二千蚊底薪嘅Sales點維生吖！唔通真係要同個成日喊窮嘅政府攞失業救濟金咩！亞Mark睇落又唔怪得市況咁差勁，皆因財爺未到4月落實預算案的話，唔少準買家都會持觀望態度，睇吓有無調低汽車首次登記稅嘅可能，如果唔係畀多咗車價的話，分分鐘收唔番㗎！難怪香港汽車公會同業，至今都好似自顧閉門造車咁，冇向外界反映同業嘅苦況；又難怪貪心嘅財爺，諗住以低價買入新車之後，就去調高汽車首次登記稅項，從而為庫房帶來多七億元收入啦！