今年世界一級方程式錦標賽喺新賽例新形勢下開鑼，頭場揭幕戰結果由麥拿侖車隊嘅古達奪標，到第二站馬來西亞（於Sepang賽車場舉行），大家估計法拉利車隊將會大熱勝出，並能為今年賽事打開勝利之門；殊不知賽果竟然會係出人意表，無論排位賽同正式比賽，都係一眾年輕新秀嘅世界。究竟點解會有咁嘅情況出現呢？不如𠵱家就嚟睇吓，我哋特派記者於馬來西亞Sepang賽車場嘅現場報道啦！
特約記者、攝影：利廣源
今年嘅世界一級方程式錦標賽，引進咗唔少新賽例，例如排位賽使用兩回合各一次過跑一個圈，而且喺星期六嘅排位賽舉行後，不但唔准各車隊繼續調校參賽車輛，就連加油亦都唔畀，即係話要用排位賽後一模一樣嘅情況去落場比賽；故此車隊同車手要喺排位賽前已經計劃好，用點樣嘅部署、戰法同輪胎等等，務求在賽事中勝出。所以亦帶來好多意想不到嘅不穩定因素，理應唔會再好似過往咁，由三幾隊車隊包辦所有前列位置。
到正式比賽當日，一起步兩部雷諾戰車果然衝出帶頭，不過舒密加亦非善男信女，喺首圈賽事第二個彎，已貼近第二位嘅杜尼；但因為舒密加心急超前，令其法拉利戰車與杜尼嘅雷諾戰車發生碰撞，兩部車都受損，齊齊跌到第十二同十三位，而舒密加重要入Pit修理戰車㖭！
喺剛舉行嘅馬來西亞賽站上，排位賽就爆出冷門戰果，竟然由兩部雷諾車隊嘅戰車得到頭兩位，排頭位更係只有21歲嘅年輕西班牙車手艾朗素；佢喺今年才正式為雷諾出賽，而佢亦曾於2001年為文諾迪車隊出戰，但今站就第一次獲得排頭位出賽，而佢嘅隊友杜尼就排第二。喺星期五得到最好成績嘅舒密加只係排第三，外界估計雷諾應該用咗輕負油量嘅跑法，一於準備一起步就快放爭取領先優勢，然後盡快加油。
當舒密加同杜尼嘅戰車發生意外後，反而益咗艾朗素快放領先，而麥拿侖車隊嘅拉高倫，就趁隊友古達喺第三圈因壞車退出比賽而進佔第二位，另一部由巴里哲奴駕駛嘅法拉利戰車，都超過沙巴嘅希菲特而走上第三位；相反入Pit修理戰車後嘅舒密加，再由賽會罰其引起意外之罪，要多駛過修站理一次，因而令其名次再往下跌。
領先嘅艾朗素果然不出所料，喺第十四圈就要停站加油，拉高倫因此得到帶頭之利；之後雖然經過兩次加油，拉高倫喺第二十三圈起就一直領先，而巴里哲奴則在艾朗素第二次加油時超前，但拉高倫帶出已遠。而艾朗素嘅雷諾戰車就因為波箱有問題，亦無力挑戰前車。三部車嘅名次一直維持到賽事結束為止。去年本站冠軍嘅拉夫舒密加就穩穩陣陣守在第四位，因撞車而落後嘅杜尼同舒密加則一路努力奮戰，名次亦不斷提升，其後更在尾二圈乘英美車隊嘅畢敦，其戰車輪胎不繼而超前，兩人分別得回一席第五和第六位。