格林美得獎樂隊LinkinPark，繼銷量衝破一千萬大關嘅處男大碟《HybridTheory》後，噚日推出嘅新大碟《Meteora》，首批特別版更附送DVD，當中除咗公開樂隊將旅遊巴士同住所改成錄音室嘅片段外，亦收錄咗佢哋到鬼屋拍照時困𨋢嘅情景，一眾成員又戴住防毒面具玩塗鴉，好似上戰場咁。
唱片公司為咗防止盜版出現，今次特別採取嚴密保安措施，每次工作人員試聽完LinkinPark嘅新碟之後，必須即時銷毀隻CD，而早前喺美國、新加坡同本地嘅試聽會上，大會亦事先向到場傳媒搜身，防止有人盜錄。
此外，LinkinPark成員早前到新加坡宣傳新碟，曾任職插圖師嘅DJ成員JoeHahn接受訪問嗰陣話：「我哋全部都係超級動畫迷，每次拍MV都有好多概念，所以遲啲會籌拍動畫電影！」Joe亦不忘賣花讚花香咁話：「我覺得今次每個成員嘅技術都進步咗好多！」