好耐冇見時裝名人「爆炸Q」，佢喺時裝界十分出名，做形象指導一流，經常令人留下深刻印象。最近佢去咗做雜誌時裝版，經常出入時裝舖。聽佢講，𠵱家做時裝雜誌好慘，原來佢哋所影嘅名牌時裝由中環啲名店借出，攞番雜誌社影樓再着上模特兒身上影相，影完相當然要還返畀名店，往往最易出事就係還衫時，有時影相時整污糟咗，例如唔小心黐咗唇膏印就一定要賠畀名店，好多時都要「爆炸Q」自己負責番，有時搵埋一個月人工都唔夠賠。
最近「爆炸Q」去「名店S」借咗件過萬銀大褸，影完相後被名店要求最好乾洗一次先還，「爆炸Q」照遵守，名店亦都收番件衫。原以為大家相安無事，點知過完冬季後，「名店S」打電話畀「爆炸Q」話件衫賣唔出，懷疑同佢借完去影相，變得唔夠新淨有關，所以希望「爆炸Q」叫公司賠償。「爆炸Q」話生意唔好，估唔到連名店要咁樣搵生意，實在可悲。最後佢當然唔肯賠，而名店只好死死氣，繼續搵第二間雜誌社食死貓。
主持人：大食Jack
八卦熱報：