經過十多小時的機程之後，終於正式踏足洛杉磯，開始直擊姚明之旅。
因為行程安排的關係，今日無任何地方要去，所以比較得閒。不過到達酒店後發覺並無上網服務，可以話係晴天霹靂；假如我搵唔到地方上網傳相同稿返香港，我諗老細殺咗我都似。
由於距離晚飯重有成六個鐘頭，為咗唔好嘥時間，我就同香港一齊嚟嘅兩個行家搭的士出去Downtown搵商用上網中心；結果皇天不負有心人，喺Downtown終於俾我搵到Kinko's，即係上次我喺亞特蘭大直擊明星賽同一間公司，開心到我幾乎想錫啖入面個職員咁滯。
放下心頭大石之後，我重有時間去隔籬Macy's執咗兩件香港無得買嘅佐敦product，所以話勤力總係有回報。今晚養足精神之後，聽日（香港時間今早）就會正式開始直擊第一戰快艇對火箭比賽，關心姚明嘅讀者，記得唔好錯過！
本報記者雷海彬洛杉磯直擊