本地非典型肺炎感染個案不斷上升，連日來每天平均增多約二十宗，連醫管局總裁何兆煒都感染病倒入院，中文大學教授梁秉中形容，現時本港的情況「好得人驚」，政府根本未有積極面對，加上廣州奪命肺炎爆發情況仍未受控，本港可說是處於一個「內外夾攻」的高危狀況。 記者：簡慧茵、徐岱靈、陳倩雯
【本報訊】對於政府昨日公布對付非典型肺炎的四大升級措施，中文大學醫學院矯形外科及創傷學講座教授兼中醫中藥臨床研究中心總監梁秉中，炮轟當局反應過慢，「𠵱家先咁做，係可恥地慢！」
他指出，非典型肺炎是由飛沫傳染，故必須控制帶病的媒體，「應該要諗方法防止人流互相傳播……唔係單憑話搵到病毒就吹一輪，搵到個元兇喺九樓之後就停，要進一步唔好俾個病毒媒體走入高危嘅環境。」他認為，衞生當局的意識不足，未有足夠防範措施。
對於有指政府經常企圖將事件降溫，梁秉中也有同感，「佢哋（政府）𠵱家有個心魔，盡量裝作正常，佢哋冇公共衞生常識就唔夠敏感，若果有更多嘅傷亡，負責衞生嘅人實在難辭其咎！」
本港現時每日約多增二十宗非典型肺炎個案，他指出情況「其實係好得人驚，再咁落去真係唔掂！」醫管局總裁何兆煒現時在醫院接受治療，梁秉中認為，是響起一個嚴重的警號，「社區病發嘅走勢令我擔心，𠵱家連總司令（何兆煒）都病倒，呢個係一個唔好嘅訊息，冇人知佢係咪喺社區得到呢個病。」他憶述稱，何兆煒於早前到威爾斯親王醫院與他商討有關肺炎事件時，並未戴上口罩。
梁秉中以「厲害加詭秘」來形容今次非典型肺炎事件，因為此病一般潛伏期是五至七天，但有病人接觸病毒後四周才病發，但也有人數小時內病發，他指「個肺好快花晒！」廣州自去年十二月至今近四個月，約有二百名病患尚在接受治療，相信當地每日仍有新個案，但港府似乎尚未明白事件的嚴重性。
「呢個病咁怪，喺廣州搞咗咁耐，香港點可以重係視若無睹？𠵱家燒到上門檻，都重係好似冇嘢咁。個態度就係總之你信我就冇事。」他又稱，當局甚至相信香港一定會沒事，「有人假定，以廣州嘅設施同水平都搞得掂，香港咁先進怕乜鬼？得㗎啦！……我估佢哋未必可以掌握廣州嘅實情。」
他又以禽流感一事為例，若兩地增加交流，相信不會多次發生同樣事故，「雞就話可以殺晒，唔通燒晒啲醫院？𠵱家係人命關天，唔可以喺度等人哋發放資料。」他指港府應密切留意廣州情況，並參考當地經驗。他認為，自從爆發非典型肺炎後，當地整體衞生意識均較本港優勝。
他並稱，廣州是使用中西藥合璧療法，雖然現時尚未有證據顯示中藥的成效，但他認為一些清熱中草藥，如板藍根、夏桑菊、夏枯草等多服也無妨。