光大科技（256）傳聞賣盤多時，小初亦曾經提過好幾次，但賣盤一事一直只聞樓梯響，而且光科今個月內，一口氣達成兩單交易，究竟賣盤呢件事，幾時先會實現？
光科首先公布，以接近1億元購入北京朝陽區一個住宅項目；然後又用917萬元向同系光大國際（257）及ING北京投資（1062）買入光大木材。
經紀陳話，光科近期兩宗交易，據聞與賣盤有關連，亦可能係其中嘅條件。傳聞北京幅地同新買家或有關連，而光科阿媽亦想甩咗光大木材好耐，所以彈畀光科。
光科將於周四公布業績，唔排除買賣雙方會睇埋條數，先至決定價錢。
不過，市場傳聞光科就算賣盤賣得成，並提出全面收購，價錢都唔慌理想，各位Fans無謂抱太大期望。
光科先排受到賣盤消息刺激，股價一度升穿0.30元，但收尾因為件事冇聲氣，股價再回落至0.27元至0.28元徘徊，噚日跌1.82%，收0.27元。
慕容小初