鷹君同市建局嘅旺角重建項目，正式命名為朗豪坊，項目由收地到落成歷時逾十年。噚日第一次開記者會，為隆重其事，發展商租咗部旅遊車載一眾記者，環繞物業一圈，重同記者玩遊戲，競猜寫字樓、商場同酒店，三幢物業嘅周界，估中或最接近嘅，可以得到單人日本來回機票一張，答案係八百三十四點幾米。
估唔中唔緊要，發展商已準備潮流LOMO相機，每人有一部。蘭西滿心歡喜返公司四圍影，但因為部LOMO無閃燈，大部份相都唔夠光，睇嚟呢隻潮流玩物，只適宜日間室外拍攝。
講番噚日嘅命名儀式，鷹君同市建局兩邊負責人都有出席，佢哋不約而同地預期，項目將會成為旺角新蒲點，雖然物業坐落喺黃色事業較興旺嘅地點，但鷹君集團副主席兼董事總經理羅嘉瑞，並唔擔心會影響商場嘅形象，重話個場係老少咸宜㖭。
業主出租單位最怕遇上租霸，所以若果對方係好租客，就算平啲租都制，日籍租客就最受業主歡迎。香港置業營業經理屠淑明話，大坑嘉崙臺（圖二）A座低層單位，面積2141方呎，三房設計，望馬場景，業主就見個租客係日籍人士，重喺大公司做，所以收平3到5%，月租4.4萬，呎租二十個六。嘉崙臺只得六十伙，放盤又少，業主叫價一向都好硬淨。
事務繁忙嘅長實趙國雄（圖三右三），呢排成日香港上海兩邊走，幫旗下樓盤搞路演，留喺香港嘅時間就要分秒必爭。噚日佢就一次過舉行兩個記者會，講三個樓盤嘅進展。為方便同省時起見，兩個記者會都喺同一場地舉行，講完一單，換個布景就做下一單，夠晒慳水慳力。趙國雄話，咁樣中場換布景，好似做話劇咁，做完一場換個景再做下場。在記者嚟講，唔使四處跑就最方便不過，真係一家便宜兩家着，一雞有兩味。
開完兩個記者會之後，呢位大忙人晚上又要出席尖沙嘴港景匯商場，金怡購物天堂嘅記者會，一日跑足三場，堪稱地產界「趙三組」。
房協將軍澳怡心園，雖然以全區歷史最平呎價推出首批單位，但因之前南豐已率先低價推出將軍澳廣場，珠玉在前，令唔少人認為，計埋樓盤嘅質素，個價唔算平。利嘉閣董事廖偉強就話，怡心園價錢應該係全區最平。
廖偉強講，估計將軍澳廣場整個項目平均呎價二千五蚊，但怡心園整體計平均每呎只係兩千蚊多啲，所以計落平兩成。不過怡心園已落成四年，交通同質素又差些少，平兩成值唔值，就見仁見智嘞。
地產代理成日都想爭取見報率，但係有時花招盡出，都未見青睞，有啲代理高層就索性問傳媒，佢哋想要啲乜，等第時畀料唔使吓吓石沉大海。
另外，𠵱家日日都有咁多發展商開記者會，代理要搞活動自然處於下風，解決嘅方法就係早啲開，不過又唔可以太早，十二點就啱啱好，等記者採訪完，重有時間食午飯再走下一單新聞。𠵱家做代理唔單止要搏，重要夠細心識攝時間。
蘭西
電郵地址：
