羅馬前日領先皮亞琴察三球之後，原來後衞艾迪亞曾經射失個十二碼。雖然係咁，出咗名惡死嘅羅馬球迷依然好團結咁俾熱烈掌聲鼓勵呢位老臣子，場面感人。計我話今季羅馬愁雲慘霧，換轉係第二個射失，唔噓聲四起至出奇。呢啲就係忠心嘅報酬嘞。
呢位響羅馬度過咗十三個寒暑嘅巴西兵，講明踢埋今季就收山，「時日無多」，加埋前日隊波遙遙領先，所以班隊友都好識做讓個十二碼俾佢射。
今時今日可以響一間大球會踢十年，攞老人牌嘅名將真係買少見少，對於呢啲稀有品種大家都會多一份包容。估唔到因為艾迪亞射失十二碼，令球迷個心再凝聚番一齊，真難得。
自從韋利早排對紐卡素入波後除衫，露出個心形圖案後，已經有人踢爆佢係幫人賣廣告，只係韋利死口唔認，話個心係代表佢對國際米蘭一條心喎。之但係前日AC米蘭贏祖雲達斯後，馬甸尼又除衫露出相同圖案，經再三查證原來係間就開嘅服裝公司嘅商標。幫人賣廣告啫，好心韋利做得出就唔好怕認啦。
蘇格蘭足總盃半準決賽爆大冷，足協盃四強分子些路迪作客甲組嘅因弗內斯輸○比一出局，另一支國內班霸格拉斯哥流浪亦作客被鄧弗姆林迫和一比一。我求大俠真係戥貪佢哋贏波賠率一點一倍，以為贏梗用來串過關嘅波友唔抵囉！鬼咩，連些路迪自己都以為贏梗，用咗八個副選上陣，出局都抵佢哋死啦！
呢排本報名家響過關擂台中三串四嘅頻率幾高，淨計上個禮拜六同日中四次，華度禮拜日又中正：阿仙奴、西維爾同科木三W㖭。響度順便更正一吓，噚日我哋個威水版提到蘋果波神響禮拜六中咗三串四，不過打錯咗，個組合唔係伯明翰W、AC米蘭W、華歷簡奴W，而係伯明翰W、AC米蘭W、漢諾威W至啱。
噚日NBA嘅網隊又大熱倒灶，一個月內第二次輸畀「魚腩部隊」騎士，我求大俠諗起網隊前鋒馬田早排係明星賽嗰陣，曾經揶揄騎士中鋒伊古斯卡斯唔配入選明星賽，唔知係咪呢番話激發呢位中鋒嘅鬥心，佢喺噚日同上次個場勝仗咁啱都係攞咗全隊最高嘅二十九分，大意失荊州，因住累網隊個分區榜首輸畀76人呀！