最近同啲電影人傾偈，佢哋一提起嗰位以為自己好巴閉嘅內地女影星就火起，同佢合作過嘅工作人員都話最好冇下次合作機會，特別係啲服裝同梳頭阿嬸就最頂佢唔順。
早排有個服裝阿嬸俾佢呼呼喝喝，個阿嬸攞鞋畀佢換嗰陣，幾乎嬲到想成對鞋車過去，不過最後佢都係將對鞋掟咗落地。
其實唔止幕後工作人員唔鍾意佢，連幕前同佢合作嘅影帝、影后都頂佢唔順，所以佢哋重夾埋整蠱佢，話說有次內地女星見到兩個影后同個影帝喺度，梗係熱情如火咁擦晒鞋，點知嗰兩個影后一早知佢份人平時好講階級，成日畀面色啲工作人員睇，所以佢兩個嗰晚係咁灌醉個內地女星，等佢嘔到死死吓，總算係為啲工作人員出番啖氣。
黃子華被指日前喺佢嘅棟篤笑中取笑霆鋒應判終身監禁一事，掀起一場風波，子華對呢件事非常重視，除咗打畀四哥解釋外，噚日佢重喺商台嘅電話訪問中澄清，佢話：「霆鋒呢一part係四個主要部份嘅其中一個，我覺得報紙係斷章取義。基本上我個騷從來都得罪唔少人，今次係有需要澄清，因為呢一次係同我主題相違背，有人受到傷害，我實在冇咁做過。」
胡杏兒噚日出席喺美麗華酒店舉行嘅舞台劇《寒江釣雪》記者會。
今次係胡杏兒第一次做舞台劇，喺呢一連二十場嘅《寒江釣雪》舞台劇度佢會飾演粵劇名伶薛覺先嘅紅顏知己，劇中講佢係一個苦情歌女，佢喺個台度要又唱又跳兼成日喊，所以佢重專登買咗薛覺先嘅唱片嚟聽，希望可以多啲了解薛覺先。
梁詠琪（GiGi）今日二十七歲生日，佢前晚單獨由泰國返港，原來佢趁開完香港演唱會，就同台灣唱片公司嘅同事去泰國歎spa。前晚記者問GiGi點解伊健唔嚟接機，GiGi話：「我有其他朋友嚟接呀。」點知有人發現伊健駕車泊喺停車場度，踼爆咗GiG講大話。早排病咗嘅蔡卓妍，前晚亦精神奕奕喺機場出現，問佢去咗邊度玩？佢話：「唔話畀你知。」
非典型肺炎喺香港引起恐慌，章小蕙噚日話佢個仔患咗感冒，又發冷又發燒，令佢鬼咁擔心，佢話：「我自己喺米蘭病完返嚟，就輪到個仔，我已經封鎖咗佢喺屋企一個禮拜，諗住今日先畀佢返番學。」問佢出席社交場合，見面禮都興輕吻面頰，𠵱家會唔會減少咗？佢話：「咁都唔驚嘅。」
