大記者、公關大姐大一齊傳真一張中藥方畀左丁山，據講係預防非典型肺炎之用，佢哋話由廣州傳出嚟嘅。細看之下，兩張藥方不大相同，主要藥物係板藍根、夏枯草、金銀花，其他嘅就有野菊花、恩陳、杏仁等等，都似係「降火清熱」嘅藥物，身體虛，忌寒涼者，未必合用。為穩陣計，都係要問過中藥專家先，唔敢公開住。
𠵱家談非典型肺炎為之色變，五間學校都有學生中招，冇法子唔令人擔心。呢個病毒，害得威爾斯親王醫院（下稱威院）好慘，中大醫科生、醫生、護士、收症人員，凡為病人治理、接觸過嘅，全部受感染。創傷骨科專家梁教授目睹慘況，見到今日談笑甚歡嘅同僚，明日竟進入高危病房，為之感慨，更加憤怒，一怒之下，就寫咗一篇文章喺《信報》刊登，左丁山睇完為之眼紅紅。做專科教授醫生，幾十年來幾時曾經咁樣痛苦過？梁教授為人滿腔熱情，到內地搞「關懷行動」，義務替內地偏遠地區窮人治殘疾，乜嘢辛苦法都見過，但服務喺號稱先進，自己有份參與嘅大醫院，慘遭橫禍，自然谷氣到極。究竟佢為何如此谷氣，大家睇吓篇文就知道，楊永強、何兆煒更應特別留意。梁教授身兼中大醫學院院長，左丁山特別叫人將上述兩張藥方畀梁教授參考，希望佢筋疲力倦之餘，有時間研究吓。