雖然美股上周五大幅扳升，但香港股市一於當冇到，整日在窄幅徘徊，收報9108，跌70點，成交額66.9億元。
e莉莎話，股市現成為戰爭市，戰局最新影響先係關鍵。噚日開市前，各大電視傳媒都提及有一隊美軍中伏，至少10名美軍被殺，5名被俘，伊拉克電視台更公開戰俘嘅樣子。投資界視呢項消息係壞消息，因為睇嚟美國唔會好似預期咁快打倒侯賽因，美國人嘅反戰情緒一定更強烈，加埋晏晝侯賽因現身螢幕，粉碎其重傷傳聞，搞到美股期指噚日大跌，由於美股已連升8日，睇嚟會有較大嘅回吐壓力。
阿虎相信「速戰速決、經濟好轉」只係美麗嘅誤會。港股提早炒埋噚晚美股下跌嘅因素，大家唔使預期港股短期有好轉迹象，如果能守住9000水平已算好彩。
南華早報（583）公布去年賺1.025億元，大幅倒退7成多，遠遜於市場預期，反映廣告業經營環境惡劣。雖然南早派4仙末期息，派息率達122%，但業績實在好差，令股價受壓，最後倒跌1.7%收市，收報2.80元。阿虎相信，消息對周三公布業績嘅另一傳媒股TVB（511）屬壞消息，此股將有沽壓。
港交所（388）失去上市審批權，收益料受壓，股價急跌8.3%，收報8.75元。阿虎同好多老友傾起，覺得呢件事對港交所盈利嘅影響應屬中性，短期沽壓只係心理因素，加上佢之前派高息，股價在8.50元應有支持。
超大農業（682）公布嘅半年業績跌6%，比市場預期差，股價即急挫13.7%，收報1.32元，反映民企股仍未能恢復市場信心。反而唯冠（334）剛公布嘅業績交足功課，收報1.04元，升6.1%，大家不妨留意一些交到功課嘅工業股。
阿虎