梁錦松偷步買車一事發展到如今，大家除咗想知有冇人會下台，重想知特首捉行會內鬼捉成點。特首辦話呢件事「政府會作內部適當處理」，言下之意，係搵到洩密者都唔會公開。
查洩密呢個重任原來落喺保安局長葉劉淑儀身上，警方亦會幫手。行會有一特首、三司、十一局以及五位非官守成員，特首辦主任林煥光同中央政策組首席顧問劉兆佳亦列席，共二十二人，應該好快查完。八方扮吓金田一，幫葉劉抽絲剝繭搵兇手。
十一局之中，除非馬時亨想阿松民望低過自己，否則冇理由出賣老頂兼同學；葉澍堃出名怕死，一碰到行會嘢就猛話「死罪」唔講得，況且佢同廖秀冬都係阿松港大七三年校友，唔會想阿松死住。
唐英年雖然同阿松爭出線角逐第三屆特首，但係佢嘅策略係以靜制動，總之唔犯錯就會贏，冇需要親自出手。至於三位醫生就甚忙，李國章想唔撈返去陪太太，楊永強已經申報利益，毋須爆料，何志平出名大口，但亦無謂多事。
班舊官中包括孫明揚、王永平同葉劉等可能好㷫，因為咁小嘢都搞成咁，重有面見人嘅？林瑞麟相信暗暗高興自己守口如瓶，全無破綻。
剩番重有兩司，梁愛詩最憎俾人洩密，至於煲呔曾本來嫌疑最大，不過佢最鍾意捉人洩密，除非賊喊捉賊咁高招啫。
既然喺班高官中搵真兇咁難，不如田北俊食埋隻死貓算啦，反正佢老哥都話，又唔係漏咗預算案內容，小兒科之嘛，咁就可以等梁振英、鄭耀棠、廖長城同曾鈺成佢哋鬆一口氣，何樂而不為？
傳真︰2623-9278
電郵︰