去深圳玩少不免落Bar鬆弛一下，飲吓酒傾吓偈，的確賞心樂事。最近在偶然的機會下認識了羅太，聽佢講深圳有間西藏酒吧，內裏極具西藏特色，由裝修、飲食，以及表演節目都同西藏本地的酒吧不遑多讓，好玩到震。搞到我都心思思，即刻去睇睇有乜咁好玩，結果無令我失望，晚上的表演節目的確精采，毫無悶場，的確出色！
記者：歐嘉荃
攝影：陳昇
雖然我未曾到過西藏，唔知真真正正的西藏酒吧如何，不過第一次踏足這裏，已被其裝修吸引，店內以原始味道極濃的裝飾物點綴，全店的光線極之昏暗，只有十數盞紅色的燈光映照着，充滿神秘的色彩，羅太話呢啲裝修及神秘的感覺同西藏的酒吧差不多，勾起多年前到西藏旅遊的回憶，不過羅太最鍾意都係睇極富風味的藏族表演。
每晚大約十時便是ShowTime，咁多表演中，我最鍾意睇拔河。擔任司儀的劉先生會邀請場內人士玩充滿特色的藏族拔河，藏族拔河唔用手玩，最激係用頸玩，兩位觀眾將繩圈掛在頸上，然後用力將對手拉倒，我睇住兩位參賽者出盡渾身解數，又做拱橋，又做蜈蚣彈，先可以將對手拉倒，加埋場內觀眾的尖叫及拍掌聲，的確夠墟冚。
西藏的歌舞可說是眾多少數民族中最精采的，呢度嘅歌舞表演當然唔會令你失望。四位穿了傳統西藏服的舞蹈員一開始便表演迎賓歌舞，礙於舞台較細，所以舞蹈以旋轉為主，最令我難忘的，是她們隨着演奏的音樂自轉十多個圈都唔暈，的確厲害。
跳完舞表演慾特別旺盛，好多人都會跟住唱K，呢度唱嘅歌都充滿西藏色彩，好彩歌詞是普通話，慢慢跟住唱都應付得到，我見在場的觀眾起初不願唱，唱唱吓都唔再怕醜，愈唱愈興奮。
老闆見佤族的小文今日嚟捧場，即刻邀請佢上台吹樹葉。佤族有中國印第安人之稱，佢哋最叻就係吹樹葉，我一直以為呢招吹樹葉是電視虛構出來的，點知真係有人識，而且唔止吹單音咁簡單，佢將整首「月亮升起來」完整吹晒，真係唔到我唔服。
一踏入門口便會見到一排排酥油燈，這些燈是祭神不可缺少的物品，含祝福及供奉的意思，散發淡淡的紅光，是場內主要的燈光來源。
西藏的宗教色彩極之強烈，酥油燈之下便設有經筒，經筒上刻了「唵嘛呢叭咪吽」六字真言，每次轉動經筒代表已念一次經，轉時謹記要用右手兼且順時針方向。
名字帶點宗教色彩的袈裟牛肉，充滿濃濃的藏族風味。廚師將西藏人至愛食用的牛肉剁碎包上雞蛋煎香，外層入口香脆，裹着的牛肉味道濃郁，用來佐酒就最好不過。
售價：?38
用上西芹絲、青椒絲、紅蘿蔔絲、薯仔絲、崧子粒等炮製而成的五色彩蔬，顏色夠晒鮮豔，而這五種蔬菜代表着西藏的紅、黃、藍、青、白五種顏色，藍色代表藍天、白色代表白雲、黃色是土、紅色是火、青色是森林，極富心思。味道方面則較為清淡，是素菜愛好者的最佳選擇。
售價：?18
這裏的青稞酒（前）是自家調製而成，廚師將青稞煮熟後加入酒餅，讓其發酵，大約三日便成酒。青稞酒的酒精含量只有5%，味道酸酸甜甜，似果汁多過似酒。另外不得不提酥油茶（後），酥油茶用磚茶以水熬成濃汁，加入酥油及奶粉，味道帶點奶味，第一次飲的話必定覺得味道怪怪，我就鍾意飲青稞酒多啲。
售價：每杯?10
未夠鐘睇表演的話，我就建議你去玩吓沙狐球，店內設有康樂室，有張沙狐球桌，可以兩至四個人比賽。沙狐球的玩法其實十分簡單，只需將對手的球撞落坑便算勝出，不過要控制力度及方向，的確幾難掌握，我自問無乜天份，每次玩都將自己個球推咗落坑。
想加深對西藏的認識，這裏有很多關於西藏的書本可供閱讀，好似西藏經濟、宗教、貨幣等書籍，有些書本老闆搵咗好耐先搵到，絕對值得慢慢閱覽。
這裏貼滿近百張的西藏相片，全是老闆及顧客遊西藏時拍下的，張貼在店內供大家加深認識西藏，你有好相的話，不妨將相貼在牆上，給大家分享。
扎西德勒吧
地址：深圳市紅嶺中路2033號上海時裝公司三樓（七支隊斜對面）
電話：(86)75582418028
營業時間：4:00pm-2:00am