一味窩輪：9462數據靚可吼

港股最高嗰陣，升84點，最後埋單反跌70點。冇跟美股升，係預咗美股昨晚會跌，跌嘅理由係美軍打伊拉克唔係太順利，亦因為美股累計升幅唔細會有回吐。大市調整吓都有好處，清涼一下，可以襟玩啲，繼續吼低位收啲藍籌Call輪博反彈。
中銀（2388）派上市首年成績表後，大行出報告，睇好嘅多過睇淡嘅，昨收8.35元，報低1格。中銀係穩陣股票，要忽然大升唔易，要死火亦唔易，個勢係反覆靠穩，適合穩陣派股民收息。末期息21.5仙，5月2日截止過戶。
嫌中銀行得太慢，可以諗吓中銀Call輪9462，昨收9仙，7月下旬夠鐘，負溢價2%，槓桿率9.3倍，減去正股股息，隻輪實際溢價只係0.6%，槓桿率有9倍，咁嘅數據，相當靚，幾乎平水主要反映正股係牛皮股，唔係彈吓彈吓嗰隻。

德昌冇隻輪買得落手
威水輪中，和黃Put輪9577收1.8仙，升38%。下月中到期，行使價40元，和黃（013）現價45元，要跌落40元以下隻輪先至有得剩，隻輪作廢機會至少有9成半。
德昌（179）升10仙，Call輪9705收16.1仙，升20%。年底到期，溢價18.2%，槓桿率5.8倍，買唔過。其他德昌Call輪都係冇隻買得落手。
章盛