郭富城日前去咗大馬，參加「保時捷CarreraCupAsia」賽車，噚日佢落場比賽嗰陣，真係險象環生。
城城揸住架白色保時捷，差唔多到終點時，喺一個轉彎區俾架二十號戰車失控撞咗一吓，結果成部跑車鏟出跑道，雖然城城臨危不亂，繼續比賽，但最後只能以二十四分二十二秒嘅成績排喺第十二位。
城城出賽前已經講過想喺呢個賽事躋身六強，佢老友沈嘉偉同邱淑貞夫婦都專登去咗大馬捧佢場，只可惜噚日嘅最後關頭，城城俾其中一部賽車撞到，先會影響成績，個冠軍就俾邱淑貞前男友關兆昌攞咗。城城對自己捧唔到盃就冇太過失望，因今次係非戰之罪。
周麗淇噚日去九龍城廣場出席宣傳活動，佢個好朋友蔡卓妍日前自嘲有精神病，周麗淇話：「佢咁清醒有精神病？佢就想嘞，不過佢都忙得開心嘅，有錢搵。好似我咁，初入行都唔捱得㗎，但係𠵱家就鍛煉到一身好武功，可以喺片場四圍都瞓得着。」
林敏驄同陳伶俐兩夫婦噚日去上海街，為一間火鍋店擔任剪綵嘉賓。伶俐話遲啲可能會幫呢間火鍋店拍電視廣告，佢重好擔心咁同記者講，囝囝呢兩日開始咳，所以決定聽日唔畀囝囝返學，怕傳染肺炎。而林敏驄就話五月會開演唱會，如果成績好嘅話，就請太太去旅行喎！
薛家燕噚日去奧海城出席活動，佢近排好似瘦咗，佢話：「我試緊一隻瘦身產品，瘦咗十幾磅，遲啲可能做埋代言人。」家燕姐今個月三十號五十三歲生日，究竟佢會點慶祝？佢話：「啲影迷幫我喺海洋皇宮擺六十幾圍酒，應該會有七至八百人嚟，到時重會玩遊戲同抽獎㖭。」
李惠敏、劉小慧同蘇志威（阿細）噚日到太子，為新片《無冕皇帝》開鏡，劉小慧同阿細第一次夫妻檔合作拍片，小慧話最唔習慣早起身。至於李惠敏喺戲中會同吳耀漢飾演夫婦，重會搞婚外情，李惠敏話接受唔到婚外情，就連「拖外情」都唔得，所以當出現第三者時，佢寧願退出喎。
