呢輪香港人真係禍不單行，響百業蕭條嘅境況下，重遇上加稅減薪裁員等問題，點知近日重嚟埋個非典型肺炎襲港，搞到亞Mark近排喺外地公幹嗰陣，重畀班外國人追問啲HKSARS點情況；但大家千祈咪誤會佢哋當咗係「香港特別行政區」下嘅獨有綜合症喎！事關非典型肺炎響世界衞生組織嘅簡稱，確實係SARS嘛！加埋響香港（HK）發生，咪畀人有錯覺囉！
亞Mark之所以提起呢輪「春瘟」襲港，你咪以為同香港車市無關呀！皆因原定喺今個星期中，福特車廠會響本港搞個大型世界性嘅Meeting，廣邀各地代理商到港之餘，廠方重會運嚟十多款新車作預展㖭！當中包括有最新嘅StreetKa、Fusion同C-Max等等，原本香港一班汽車傳媒大可先睹為快不知幾有Face；但點知喺呢股SARS風潮影響下，車廠只好被迫臨時取消呢次Meeting，委實對香港形象有一定負面影響㗎！