係人都知祖雲達斯猛將尼維特係打不死嘅鐵人，不過佢前日對AC米蘭場波就慘成眾矢之的，被「狂牛」加度素同埋史米又頭又肘撞到散晒，終於有次被撞到瞓地，成分鐘都起唔到身，真係鐵人都瞓低。
AC為咗應付尼維特都算出盡法寶，特登安排雷哥斯達響右路做波牽制住佢，而尼維特一攞波就總被人緊纏。其實呢場波出現唔少過勇同埋抽水動作，堂堂兩大班霸都算失禮。
另外，AC前鋒恩沙基入波後例牌手撐撐，前日佢入波後慶祝時唔知有心定無意，隻手打中對方蒙迪路塊面，從鏡頭睇都幾「應」。我明白基仔倒戈入波興奮，但都要顧吓人至得㗎。
截稿前重未收到英格蘭大軍最新名單，但領隊艾歷臣講明唔會好似上次咁重用新人，例如暫時唔用朗尼。梗係啦，艾歷臣執教國家隊以嚟，隊波戰績麻麻，佢重成日俾外界彈佢掛住搞關係遷就啲球會，太軟弱。嚟緊國家盃外圍賽再冇好成績，佢個位隨時危危乎，重點咁再試陣用新人？
阿仙奴球星皮利斯唔單止係支持反戰嘅和平使者，重係一個勇於認錯嘅人。前日佢承認上周中對華倫西亞時，喺完場前插水博十二碼：「當時接近完場，隊波又落後緊，我即時反應係『點解唔博一博』？於是跌低時就誇大動作。事後諗番，我真係抵攞個黃牌。」人誰無過，佢肯企出嚟承認，總算係個男子漢。
講開艾歷臣，曼聯領隊費格遜擺明唔賣佢帳，例如前日聯賽對富咸講明中堅布朗有啲傷，但係爵爺響隊波領先兩球之後依然搵佢踢足全場。好嘞，最後曼聯贏夠三粒就話布朗仔拉傷咗腿肌，短期內唔適宜代表英格蘭國家隊。好明顯唔想比艾歷臣用自己啲兵。印象中，呢次已經唔係爵爺首次玩謝艾歷臣囉，鬼叫瑞典佬響英格蘭地位唔及費爵爺咩！
雲拿保斯同列斯「分手」幾日，已經忍唔住出嚟狂插會長列斯杜爾，話對方係偽君子，呢頭重話支持自己，嗰頭就請佢食無情雞。雲拿保斯重話隊波不斷賣走主力搞到佢無兵可用，慘成代罪羔羊云云。最激係佢睇死隊波搞落去都唔慌掂，語氣似咀咒多個係真心關心隊波前程，真係反轉豬肚就係……。
逢周一至周五見報