上深圳工作大大話話都有五個月，成日去到邊食到邊，中國地方菜食唔少，反而西餐就好少接觸，連平日最鍾意嘅意、法菜都食少咗，最近又心思思想食番餐，結果朋友介紹我去一間由日本人開嘅意大利餐廳試試，重以為日本人賣意大利菜唔慌正宗，食完後發覺其味道和款式都同正宗意大利餐館有得揮。我同日籍店長兼廚師大川先生傾過偈，佢推介了三款最受歡迎嘅傳統意菜畀我試，有好嘢當然要公諸同好啦！
記者：黃希知
攝影：Manny
餐廳位置頗隱蔽，如果唔係朋友帶我去，我諗都唔係咁易搵到，餐廳環境好寧靜，昏暗燈光加輕柔音樂，高級得來唔會有侷促感，客人多數係日本人，每次有客人離開，店長總會用日本人一貫友善嘅態度送客，令我有賓至如歸的感覺。
第一次同店長兼大廚大川先生傾談的感覺好特別，因為用普通話同一個日本人溝通都係第一次，佢住在深圳已有五年時間，所以識講又識聽普通話。問他為何要學做意大利菜，原來全因自己鍾意食，「其實好多日本人都鍾意食意大利菜，我都唔例外，不過喺深圳食過好多間意大利菜，覺得自己煮得重好食過佢哋。碰巧當時有間日本外資公司嘅老闆想在深圳發展意大利菜，所以就叫我幫手，成為呢間意大利菜餐廳的廚師及店長。」
入到餐廳還以為自己去咗日本，事關餐廳十圍枱有九圍都係日本客，拍攝當日亦唔例外，雖然置身意大利餐廳，但見個個一樣傾得興高采烈，就好似喺日本居酒屋一樣咁Free，毫無拘束感。
大川先生話好味嘅意大利麵係要做到入口煙韌，佢哋專誠由意大利運來意大利麵，夠晒正宗，加上大廚嘅傳統做法，意大利麵果然做到入口煙煙韌韌。醬汁則用意大利去皮番茄同忌廉煮成嘅番茄汁，加入新鮮花蟹同煮，鮮番茄味同鮮甜蟹味合而為一，兩種味互不遮蓋，鮮味和酸味分明。
日本食客山口伸治：「我剛巧來深圳做事，會逗留三個星期左右，今次第一次來，是由朋友介紹的，我覺得這裏的食品味道好好，意大利麵做得特別好食，店長好好人，招呼很好，所以我下次有機會來深圳的話，一定會再幫襯。」
侍應捧上意大利薄餅，望望餅底，一見餅底非常薄又凹凸不平就知是自製，夠正宗。以前嘅意大利人只會將薄餅當作前菜來食，所以餅底必須要做得夠薄，呢度都唔例外，而最受意大利人歡迎的就係呢款鮮番茄汁加Mozzarella芝士，自製鮮茄汁酸味剛好，焗溶嘅Mozzarella芝士煙韌濃香，餅底香脆得來不會太乾，三者混合口感同味道都好豐富。
香港客人Marchi：「我嚟過三、四次，食物同一般傳統意大利菜差不多，日本人開意大利餐館幾有新鮮感，而且價錢比香港平好多，佢哋個薄餅做得幾好，其他小食都唔錯，加上日本店長招呼好周到，食得好舒服。」
當侍應將湯捧上後，我第一時間就趁熱將塊酥皮𠝹開，酥皮同香港食開嘅有少少唔同，油份無咁重，可以放落湯度浸湯食，土豆湯望落同忌廉湯差不多，湯味有濃郁薯仔同洋葱香，雖然無湯料但都唔覺寡，大川先生話湯係用新鮮薯茸再加牛奶同洋葱熬製，再鋪上自製意式酥皮焗成，呢款湯喺意大利好出名。
蘑菇意大利麵咁簡單，有咩好食？最後終於經不起大廚的推介，叫了一碟試試。選用新鮮蘑菇同購自意大利嘅麵條，配合自製忌廉汁，忌廉汁稠度剛好，份量不多不少，每條麵都均勻蘸上香滑的汁料，食完唔覺膩，加上清甜蘑菇香味，清清哋最啱素食之人。
日式燒牛舌食得多，用意大利紅酒煮又係另一番風味，大廚先將葡萄酒同雜菜熬成濃汁，將飛過水嘅牛脷輕輕煎香表面後再放入汁內煮，讓汁味慢慢滲入牛脷內，切成薄片撒上少許黑椒同食，牛脷煮得剛剛熟，肉質軟腍無羶味，葡萄汁甜甜哋同牛脷味道好配合。
我雖然對意大利菜認識唔深，但都知道當地嘅芝士最出名，唔少人食意菜都會叫番幾款嚟送吓紅酒。我唔識叫，所以學人叫了個芝士拼盤，一個拼盤就有齊Camembert、Gorgonzola（BlueCheese）、Chedder、Gordal（YellowCheese）和Emmental五種唔同濃淡味道和口感嘅芝士，其中Camembert屬於軟身芝士，咬落較軟身，而Gorgonzola味道最濃，有一種並非人人可以接受嘅特別味道，而Chedder和Emmental同屬硬身芝士，口感較重，一碟幾種口味，唔使傷腦筋。
伊太利庵
電話：(86)75582257278
地址：深圳市羅湖區人民南路深圳發展中心2樓
營業時間：上午十一時半至下午二時；下午六時至午夜十二時