香港人呢輪俾非典型肺炎嚇到冇命，因為唔知幾時會一個唔好彩中招，所以就算美伊日日打餐死，都冇乜興趣理，飲茶食飯時都係講肺炎；大家見到楊永強局長日日話冇乜大件事，又絕口不提病源係咪來自內地，就更擔心有嘢隱瞞。
呢種恐慌蔓延得好快；好似上周一話京華國際酒店係其中一個病源，八方嘅老友馬上成個彈起，第一時間數吓自己過去一個星期有冇去過，𠵱家有冇發燒、感冒；好彩就冇，佢暗自慶幸之餘，重話有排唔再去京華飲茶食晏。
京華喺何文田區，係房委會、中電同埋香港電台嘅飯堂，今次真係俾病毒累死，班熟客全部唔見人；早排房委會嘅鄔滿海調去做屋宇署做署長，就喺京華請班行家食飯，幸好冇人有事。
傳真︰2623-9278
電郵︰