馬灣「雪樂園」主題公園土地，上個禮拜截標。長實入標競投，而且好大陣仗，出動四名大漢，抬足一大箱標書交畀政府。
蘭西聽到江湖傳聞，話標書部份內容建議，用武俠小說名家金庸嘅小說做主題。究竟係邊本，消息人士就要吊讀者癮……
金庸小說，本本精采，最好睇可能係射鵰、神鵰。既然馬灣係個島，唔通會係桃花島？
蘭西認為，呢個構思最難係，點先可以做到同小說神似，令到金庸嘅讀者有同感，到時去玩，好似入咗小說世界，覺得自己變成大俠或美女。
長實趙國雄就話，旅遊業好有發展前景，係帶動經濟復甦嘅重要一環。雖然通常回本期長，但公司都會考慮。重話如果尖沙嘴前水警總部中標，都會同蘭西講吓發展主題喎。
佢話，主題公園一定要有獨特賣點，先至可以吸引人嚟玩，大笪地個啲，就唔好搞嘞。
始終唔肯大方承認拍拖嘅緋聞男女，前港姐楊思琦同李永豪，噚日喺西貢又俾人見到拍住拖，一齊去放狗睇樓。
噚日下晝，佢哋雙雙去咗西貢濤苑，參觀示範單位，雖然冇透露，究竟係想買定租，但就逗留咗成粒鐘。
蘭西記得，楊小姐已經見過家長，𠵱家唔知係唔係想搵個愛巢，組織二人世界？
講番西貢濤苑，美記獨家銷售，至今賣咗十五伙，向海每呎賣三千五。10座示範單位重以538萬賣出，呎價高達3840。
美記最近搞「深層溝通」課程，畀主管級同事參加，幫助掌握高層次溝通技巧，無論面對客戶或下屬，都可以無往而不利。四十幾位主管出席，反應唔錯。
呢個「深層溝通」課程，導師會透過問卷同練習，等主管可以了解自己同埋對手，係屬於邊個類型，咁就可以用最有效嘅方法，同客戶溝通，贏得對方信任。
課程係以互動方式進行，等員工更容易吸收。
舊區重建住宅樓盤，規模細，淨係街坊已經可以消化晒。但有啲發展商仍然肯落重本，加強競爭力。
旺角花園街19號花園廣場，係單幢商住樓，就快開賣。住宅只得64個，卻有平台花園及兒童遊樂設施。
每伙重裝埋分體冷氣、洗衣乾衣機、雪櫃、煮食爐同熱水爐等，真係「五臟俱全」。住宅每層四伙，347至536方呎，呎價三千蚊起。但係管理費就要個七。
示範單位喺附近嘅好景商業中心。發展商重安排銀行，為買家提供按揭。
一輪內購嘅將軍澳廣場，噚日終於公開發售。由於同區房協怡心園又係用低價開盤呢招，兩個樓盤難免畀人覺得有競爭。
記者問到南豐地產部經理麥一擎點睇，佢顯得好輕鬆。其間提到區內供應時，重漏計怡心園條數㖭，收尾至補番，更強調怡心園幫咗將軍澳廣場嘅銷情。
另外，麥生話，怡心園上周六睇樓人數，應該冇報章所講咁多，重話打個三折就差唔多。
蘭西
電郵地址：
