過去嗰個星期最多人搵同講嘅當然係SonyEricssonP800，等咗成大半年，Fans們梗係急不及待去出機，所以搞到幾間大行唔夠貨賣之外，就連二手店都熱鬧咗，因為唔少之前買咗水貨英文版嘅用家都拎部機去放。二手舖老闆同羅新基講，唔少人都係因為中文版先拎部英文版嚟放。的而且確，少咗中文又真係少好多嘢玩嘅。
手機秘技傳言向來多不勝數，甚至話可以Check快相雷達，講到曉飛咁滯。不過近日羅新基都收到個秘技電郵，強調係可以平一半通話費，方法就係每次打出電話嘅時候，先㩒「*#746025625#」，顯示器就會出現「SIMClockStopAllowed」，令SIM卡的計時器變慢，不過呢樣秘技就只適用於舊款Nokia機種，例如8210、8250等。羅新基都試過，照㩒真係出到段字，不過係唔係通話時間可以減半，就要等張月結單寄嚟先知囉！
手機愈出愈精巧，拎上手直情覺得自己好似特務咁。而Motorola就認為通訊唔止手機咁簡單，直情要成套着上身先夠型。所以呢套由FrogDesign設計嘅下世紀通訊器材就包括眼鏡、耳筒、數碼相機、筆以及腕表，全部可以相互以無線連接，又或者可以單獨使用。不過都係得個睇字，若果第日羅新基戴住隻咁型嘅表嚟CheckSMS，甚至播MMS，就真係冇得頂。
文：羅新基