中東開戰中，非典型肺炎（SARSyncrome）肆虐，影響旅遊業與本土經濟，已經有明顯迹象，中文大學慶祝校慶嘅大型活動——全球校長論壇——已經因為病毒與伊拉克戰爭而改期三百六十日到明年三月。冇咗幾十個校長來港，零售業點都少咗一啲生意，其他豪客唔嚟，酒店及名店就更加頭痕。酒店總經理S女士近日忙於開會，唔係因為生意好，而係好多歐洲客陸續取消訂房，搞到佢啲夥計踢晒腳，唔知今年點樣可以追番「筆直」。
摩根大通反應真快，即刻做咗一個研究報告講非典型肺炎對GDP嘅影響，假如呢間銀行嘅舊總管阿松哥對買車有咁快反應，香港人就快樂多一啲啦！呢份報告話外地遊客減少來港，而內地遊客亦減少來港嘅話，香港GDP（本地生產總值）會減低0.3%（即係阿松預測增長3%嘅十分一），咪話唔緊要。
醫生勸導市民多留在家裏，唔好到人多地方，於是馬主H一家人本來要去大會堂聽香港管弦樂團演奏LloydWebber嘅，最後臨時決定唔去。馬主H中午到駿景園商場兜個圈，只見水盡鵝飛，茶餐廳內只有夥計，去到沙田第一城搵朋友飲茶，茶客寥寥可數。如果非典型肺炎唔早日清除，本地消費一定萎縮，GDP增長率唔會降低0.3%咁少。呢類無辜辜突發事件令香港經濟雪上加霜，再遇上阿松買車，注定今年冇運行。