醫生三句不離本行，八方喺史泰祖醫生身上見識到。噚日旺角街頭一個討論預算案嘅論壇，史泰祖身為新力量網絡副主席，都有出席。
非典型肺炎肆虐，史醫生有備而來，輪到佢發言時，一企起身揸住個咪，就攞個口罩出來猛咁「揚」，話口罩同民主意識好有關係，但聽落佢嘅邏輯有啲怪。史醫生由報紙得知，好多患傷風感冒嘅人被歧視，一戴口罩，周遭嘅人即刻彈開。佢話其實冇病都戴得口罩，只要人人都戴，可以預防傳染之餘，又令病患者冇咁突出。
講到投資移民，史醫生又將話題同肺炎扯上關係，話如果爆發第三波非典型肺炎，必定影響投資移民，所以都係嗰句：「大家要早啲戴口罩！」不過史醫生始終冇將手中口罩戴上，唔知係咪嫌戴咗口罩會阻住佢大噴口水花呢？
（圖）史泰祖醫生淨係攞住個口罩「揚」「揚」吓，但就全程冇戴上。
傳真︰2623-9278
電郵︰