近排老友間嘅吹水話題不離3個：第1個係美伊開戰；第2個係非典型肺炎；第3個係打吡大賽。
有老友話，美英聯軍今次攻打伊拉克，只不過係一次20萬人大旅行，旅途中意外跌死或被自己人炸死嘅機會大過被伊軍打死。雖然佢嘅講法好誇張，但睇番近日美伊嘅戰況，情況又好似係咁。睇番美股嘅表現，更加已經係開緊祝捷會。
美股杜指上周五大升235點，連續第8日上升，收8521。至於今晚美股會否連升9日？趙飛雲覺得機會唔係咁大，一來杜指8日共升997點，升幅13.25%，9RSI已超買；二來杜指亦升近去年12月延伸降軌頂部（現處8590）。即管睇吓杜指是否如趙飛雲預測，以塔形頂回落。
港股若跟隨美股升勢，今日將再挑戰50日線9273，及長期降軌9300阻力。恒指今日若能守在9300之上收市，將係一個重大突破訊號。若問港股由誰帶動，估計以長實（001）及和黃（013）居多。不過，趙飛雲暫時仍未改變恒指9300買Put輪的策略，除非恒指今日一早以裂口升穿9300及不再回頭跌穿。
戰爭市除了變化難測外（今次則似乎例外，因為絕大部份人都認為美軍會Easywin，祝福佢唔會好似噚日香港跑打吡嘅「祝福」咁），還有就是有心人製造謠言謀利的好時機。總之，戰爭市小注搭搭順風車無傷大雅，但搏命就唔係時候。
趙飛雲