夏其龍神父過去幾十年幫助過不少被主流社會遺棄的弱勢社群。冷言冷語或帶敵視的人身攻擊，夏神父見慣了，但看到特區政府為了政治目的而作出的自私行為，由削減綜援，以至向外傭開刀，完全沒有仁愛的心，他也不禁欷歔。 記者：陳廣慧、徐岱靈
「最近睇阿松事件，覺得政府好矛盾，睇到董建華錫住佢，路祥安係咁，阿松又係咁。」
夏神父認為，如果政府對市民可以同樣愛錫，社會的景況或會完全不同。
說話慢條斯理的夏神父，娓娓道出他自己童年的經歷：「細個窮困嘅時候，爸爸知道聖誕節人哋會食火雞，但係我哋冇錢買火雞。爸爸於是用錢買鹹餅乾，同我哋講：『今年唔食火雞住，我哋食鹹餅乾，將來有錢可以食火雞。』」
夏神父說，一家人歡天喜地吃鹹餅乾的情景，至今歷歷在目。他覺得在財赤之下，港人依然可以快樂地生活，只要政府有心去做：「畀唔到火雞畀人，都可以鹹餅乾，令人覺得你有心同佢去捱。」
可惜，政府只懂推卸責任，天主教正義和平委員會執行秘書陳麗娜說：「𠵱家政府只會話係你哋一班人，拖累到我食唔到火雞！」
結果弱勢社群被邊緣化，社會價值觀變得對立，例如納稅人與綜援受助人對立；僱主與外傭對立；長期病患者與急症室使用者對立，最終人與人之間愈來愈疏離。
面對如斯境況，夏神父鼓勵港人首先要主動多走一步：「見到街上有人跌倒，去睇吓幫吓佢，入電梯㩒住畀其他人入，公共設施有問題去報告吓，互助嘅，自己可以做到嘅，都要盡啲力。」從小處着眼，總會領略到：「今日我幫吓人，聽日人哋幫番我。」
正如夏神父說：「政府權力愈來愈大，佢唔畀空間我哋，我哋自己去搵空間。」即使困苦，也可活得有尊嚴、有愛心。