非典型肺炎襲港，令港人憂心忡忡。正當非典型肺炎入侵辦公室和學校之際，原來香港電台近日亦受到肺炎侵襲，一台DJ錢佩卿被證實染上肺炎，她自稱患上的不是非典型肺炎，但化驗結果要明天才有分曉。而眾DJ做節目時均共用直播室的咪高峯，病菌極易傳播，以致港台人人自危。
據可靠消息指出，港台逢周一至周五晚十一時半至凌晨二時主持一台節目《猜、情、尋》的DJ錢佩卿，上周五發現染上肺炎，並即時向港台請假醫治。剛巧與錢佩卿拍檔主持《猜》節目的DJ倪秉郎，其子早前亦染上肺炎，由於倪秉郎在兒子留院期間，一直陪伴在側，難免令人懷疑是倪秉郎與錢佩卿做節目時，間接將兒子的肺炎病菌傳染給拍檔。
右邊肺發現奇怪黑影
事實上，電台直播室內的咪高峯，不但DJ做節目時會輪流使用，其他新聞報道員、交通消息報道員甚至是到電台接受訪問的嘉賓，也會共用直播室的數支咪高峯，若當中有人不幸染病，病菌便很容易透過咪高峯傳播開去。據知，港台方面為免肺炎擴散及預防非典型肺炎入侵，除在寫字樓發起一人一口罩行動外，更特地訂購了大批類似空氣清新劑的消毒氣體，讓DJ們在使用咪高峯前先消毒。
記者昨日以電話聯絡錢佩卿時，她承認染上肺炎，但卻堅稱並非引起恐慌的非典型肺炎。錢佩卿說：「早幾日我見咳得好厲害，又有肌肉痠痛，於是搵李家仁醫生睇吓，照吓個肺，知道自己只係普通肺炎，不過我個肺嘅右邊發現有個黑影，李醫生話有可能係痰，亦有可能係其他，但始終呢個黑影不容忽視，所以建議我再詳細照多一次。𠵱家我向港台請咗假留喺屋企休息，等到星期二就有結果，知道究竟發生乜嘢事。」
愛兒患病或間接傳染
錢佩卿又表示，由於其電台拍檔倪秉郎的年幼兒子早前亦染上肺炎，懷疑因此間接受到傳染。而倪秉郎昨日亦表示不排除有這個可能性，他在電話中說：「我都唔敢肯定，雖然我冇受傳染，但李家仁醫生話有啲帶菌者本身抵抗力強，所以唔會受到傳染。其實我哋都做足預防措施，直播室日日有工程部清理，而我哋做節目之前又會用消毒劑噴吓支咪，始終戴住口罩做唔到節目㗎嘛！」
香港電台中文台台長黃法之昨日接受電話訪問時，強調錢佩卿所患的只是普通肺炎，不過為安全起見，港台較早時已作出連串防預措施指引。黃法之說：「好似以前我哋工程部每星期清潔一次錄音室同直播室嘅咪，但𠵱家已經改為日日清潔。直播室內又擺咗消毒藥水，如果同事有需要嘅話可以用嚟抹吓支咪，另外，我哋又提醒同事喺寫字樓盡量打開窗，等空氣流通，同埋如果覺得唔舒服嘅話，就最好返屋企休息。」
直播室煲白醋點香薰
其實自非典型肺炎肆虐以來，電台DJ早已人人自危，其中邵國華為防受到感染，竟在直播室內煲白醋消毒，甚至要就讀幼稚園的兒子暫時停學。邵國華在電話中說：「我煲醋煲咗好耐㗎啦，但後來知道白醋未必有殺菌作用，同埋有啲同事接受唔到白醋啲味，所以當我知道有啲香薰有消毒作用之後，就發起喺電台直播室點香薰。我每次做節目之前都會用消毒藥水抹吓支咪，注重個人衞生，又食多啲維他命C增強身體抵抗力。𠵱家連學校都受到感染，所以我幫個大仔向學校請假，等睇定啲先至算。」
而二台副總監梁繼璋則說：「相信全港市民都應該會擔心呢個問題，其實我哋開會時已經提出過加強咪高峯嘅清潔，同埋提醒所有同事，如果覺得唔舒服嘅話就最好請假唔好返工，同埋戴上口罩，以免傳染畀其他同事。」
採訪：戴彩煥
攝影：胡比
