有「小公主」之稱嘅環境運輸及工務局局長廖秀冬，加入政府唔夠一年，竟然認老；唔通問責局長呢碗飯，真係咁難啃？
廖秀冬噚日出席小童群益會嘅環保小領袖活動，唔知點解，八方總係覺得一向神采飛揚嘅冬冬表情有啲「謝」，連最心愛嘅荷葉花邊靚衫都冇着，換上一套老氣橫秋嘅黃黑套裙。
直至佢睇完班小朋友表演，心情開始好轉，由旁觀者變成演員，即席扮演「環保女神」。台上最爆笑一刻，就係一班小朋友喺「環保女神」感召下，狂執垃圾，然後將所有垃圾，塞晒落一個用紙皮製成嘅會展模型內，搞到「會展」慘成垃圾桶。講到環保，身為人母嘅冬冬當然好清楚父母幾聽仔女話，佢話只要小朋友返屋企講一句，好過政府日賣夜賣廣告。
冬冬雖然玩得好開心，不過行動緩慢，好似重要小朋友攙扶，臨走時佢坦白話，朝早「屈親隻腳，原本以為冇事，點知……」有記者問佢點解咁唔小心，冬冬語氣更加無奈：「好慘呀！你哋唔好再問嘞！鬼叫我已經年紀老大。」
（圖）廖秀冬有禮物收，開心到連腳傷都唔記得，同小朋友一齊拆禮物。
傳真︰2623-9278
電郵︰