連續幾個禮拜香港都飽受非典型肺炎嘅陰霾影響，大使因為工作需要經常出入醫院探訪病人，見到好多人戴住個口罩以防感染，而喺街上面亦有唔少途人戴口罩，睇嚟呢種病毒已令到全港市民人心惶惶！
前幾日，同事甲同大使講呢輪成日頭痛同埋喉嚨唔舒服，同事乙話好似周身痠痛，而同事丙又突然間打噴嚏……喺嗰一刻，大家都提高警覺表現得好緊張，即刻發揮守望相助嘅精神，拎啲藥物同埋維他命沖劑傳畀佢哋。大使見到呢個場面，都覺得好感動。
跟住大使諗起𠵱家經濟唔好，讀者同暖流版嘅苦主又素未謀面，但讀者仍然咁熱心去幫助佢哋，同樣發揮香港人守望相助嘅精神，無論係捐錢、電器或者家具用品，都令到社會上貧窮嘅家庭、老弱同埋病患得到即時援助，令佢哋嘅生活得到改善。
好似血癌青年李漢傑話要籌一筆驗血經費，我哋登咗冇幾多次已經籌到十一萬幾，連埋漢傑教會籌到嘅，已經夠呢次小型Campaign用。
另外，我哋同聖雅各福群會合辦嘅「電器贈長者」計劃，𠵱家大大話話有超過一千人收到電器，即係話至少有一千人支持呢個行動；一個失聰婆婆話想要一部傳真機對外溝通，好快已經有人話要捐部新嘅……值得一提係有時因為遲咗一步，令到有心捐嘢嘅人最後捐唔到，佢哋感到失望之餘，我哋亦覺得抱歉，不過無論係邊個捐，能夠幫到人始終係好事。
暖流熱線
電話：29908688
傳真：23702192
電郵：
網址：