一副簡單對聯，就完全代表了查大俠所著的14部天書和一個中國小說史的不朽神話！澳門嘅「金庸圖書館」，肯定係所有金庸迷必到嘅朝聖之地。呢度你會睇到繙譯成多國語言嘅金庸小說、新修訂《碧血劍》嘅原手稿，更重要係部份書籍屬查大俠私人珍藏，你可以近距離聞吓佢嘅書香，甚至攞上手讀佢一天半日！
記者：朱崇德 攝影：陳盛臣
ImageGirl：彤
上星期五，位處澳門最主要街道新馬路，同「手信街」(清平直街)交界嘅百年老店「德成按」前人山人海，搞到嗰朝新馬路塞晒車！原來查大俠駕到，為新景點「文化會館」揭幕！中外記者，加埋一大班金庸迷，簡直將成間「文化會館」迫得水洩不通，好多人為咗一睹查大俠風采，更犯險企出馬路，大俠魅力果然沒法擋！
「文化會館」主要由5個展區組成，包括提倡澳門地道手信及創作的「精點廊」及「藝品廣場」、設計古雅又可供遊人歇息的「水茶軒」和提倡民俗文化再生的「文化展覽館」，不過當中重頭戲，當然係全港澳首間「金庸圖書館」啦！
第一時間殺入「金庸圖書館」。內裏嘅書藏主要由主辦單位在東南亞四出搜羅，不過最珍貴的，當然係查大俠親自捐出嘅珍藏啦。你重可以搵到查大俠十多部天書嘅日文、印尼、英文、簡體中文同繁體中文等5種語言共12個版本。最令人振奮嘅係，不論你係遊客定本地人，呢啲小說全部都可以在館內借閱。不過如果你係標準金庸迷，就一定要更留意玻璃箱內嘅特別珍藏，這裏收藏了查大俠《碧血劍》新修訂版的原手稿，全部查大俠手迹，另外還有60年代超舊版《倚天屠龍記》，相信好多人真係見都未見過，絕對值得一看！
入「金」山又點會空手而回？二樓「藝品廣場」同地下大堂嘅「精點廊」掃貨點一定要去。「藝品廣場」可以搵到澳門人自製嘅藝術精品，幾十蚊以至百零蚊有交易。至於超級金庸迷一樣會好滿足，呢度唔單止有齊完整全套金庸小說系列，更俾小記發現鬼馬嘅全木製倚天劍同屠龍刀，雕工非常精細，相信唔係咁多地方買到。
至於「精點廊」就完全集齊澳門至出名手信舖頭嘅出品；另外小記重八到，一向食得刁鑽嘅蔡瀾會聯同各家名牌老店，監製特色小食，於三個月後推出，大家去開一定要昅實！
金庸圖書館所在嘅地點，正係剛開張嘅「文化會館」，呢度曾經係一家大型當舖兼銀號「德成按」！業主本意想將整棟過百年舊樓拆毀重建，不過由於樓宇內部保存得非常好，最後在文化局官員及天地顧問公司共同努力下，成功將它修葺保存下來，成為多功能旅遊景點。記者訪問當日，巧遇一位攻讀香港大學建築系文物保護碩士課程的Cecilia，佢就大讚「德成按」文物保存工作非常成功：「文物保存係適當地保留建築物嘅歷史痕迹，『德成按』只係作少少粉飾就非常恰當！」。
如果問全幢文化會館最歎嘅地方，不作他想，一定係二樓「水茶軒」，全竹製家具，配以五色玻璃彩窗及古舊建築品味，感覺簡直好似將大家拉回百年前澳門一樣！最正係呢度重有茗茶服務，至出名嘅中國名茶大紅袍、碧螺春同「廣東茶皇」鳳凰單欉，你都可以歎到，價錢只係$30至$50，而且飲完重有一隻陶瓷茶杯送，認真超值！
另外，喺度茗茶小記有個小小心得，近旋轉樓梯的最出位置有一個細房仔，只能容得下4個座位，傳統呢度係食大煙嘅房間，如今喺度歎茶，風味一絕！
文化會館
地址：澳門新馬路390及396號
電話：（853）921811
傳真：（853）922316
網址：