二十三條嘅新聞沉寂咗一輪，最近大律師公會前主席湯家驊，同保安局局長葉劉淑儀呢對歡喜冤家，又各自出招，不過策略就大大不同。湯大狀會出書高舉人權大旗，葉劉則上巴士RoadShow節目打溫情牌，大講健康之道同親子關係。
八方收到湯家驊本新書《人權、民主與法治》，收集咗佢過去一年多篇討論二十三條嘅文章，其中可見湯大狀心路歷程嘅改變，由未見到政府諮詢文件時，對政府尊重法制充滿信心，之後經過連番失望，搞到要走上街頭派傳單反對立法草案。港大法律學院院長陳文敏為佢寫序，盛讚呢本係「不可多得的推廣法治讀物」。
書末嘅後記，湯大狀講到睇完張藝謀嘅電影《英雄》，話套戲說服到梁朝偉卻說服唔到佢，佢唔可以接受壓迫人民嘅暴君竟然係「英雄」。
比起湯大狀嘅激昂，葉劉則軟銷得多，接受路訊通《龐愛蘭會客室》訪問，成為首位現身巴士屏幕嘅高官。本周一、三、五播出嘅RoadShow中，葉劉大講健康處世之道，話每星期做三、四次運動，睇好多同健康飲食有關嘅書籍。同寶貝女兒相處，葉劉話「小事可遷就，大事則以女兒長期利益為主，絕不心軟！」顯露葉劉硬朗性情。講到做人處世，葉劉嘅秘訣係尊重信任、接受人哋意見。咁點解佢講到二十三條，又會睇唔起的士司機同侍應？
傳真︰2623-9278
電郵︰