梁錦松自三月五日下午二時半宣讀預算案之後，次日晨早喺新城財經台用錯一句「俗語」，之後香港就雞犬不寧，患上「特區綜合症」（SARSyndrome），冇一日好過，阿松更加好似犯太歲咁，失魂落魄。李白有一首詩《江上吟》，最後兩句係「功名富貴若長在，漢水亦應西北流」，中國因為地理關係，高山在西北，河水江水一概向東南流，所以李白有此一嘆。宋代陸游亦有詩句云：「功名本是無憑事，不及寒江日兩潮」，阿松哥大可細味斯言，不如歸去，否則「白頭縱作花園主，醉折花枝是別人」（唐．雍陶《勸行樂》）就唔好啦。
話說一啲高人老早講過，二○○三年三月五日屬「閉日」，時值歲破，未申時皆是凶時（下午一點到五點），松哥限於慣例，喺每年三月第一個星期三下午宣讀預算案，與破凶時撞到正，簡直係香港的不幸，更何況傅會長喺過年前一早警告：勿在年初四開工，但政府公僕冇得揀，大家惟有繼續捱。
以上所言，純屬巧合，請勿迷信。前幾日碰到一位投資界高人，佢話：「老香一早講過，根據英國人撤離殖民地嘅歷史經驗，英國佬走後，殖民地衰足十年。我見到九六、九七時香港咁發，認為老香亂噏，𠵱家知錯咯，唔怪得佢啲身家多我幾十倍！」呢位老香，當然唔係𠵱家喺電台電視出鏡嗰位，而係香植球，即係以五億五港元，將山頂大廈賣畀王坤嗰位。如果計到二○○七，董生離任之時，香港真係要回歸十年後先至有運行，呢啲就未必係巧合咯。