大牌檔，吃的是人情味，吃的是那股豪情暢飲、開懷大嚼的地踎氣氛。隨着政府不再發新牌照，香港的大牌檔已經買少見少，有50年歷史的，更是碩果僅存。
地踎？就地踎吧！反正地踎又不等於食物質素差。終有一日，大牌檔會完全絕迹，只怕你再沒機會嘗嘗做地踎的滋味，到時可別後悔。
「68年前，我老竇已經喺西營盤、灣仔街邊擺檔超過20年。到政府正式發牌畀大牌檔，老竇就第一個喺耀東街開檔，一做就做到𠵱家，夠老字號嘞啩？」老闆小曾做了38年人，全為這老字號：「我未打過一份工㗎！強記養活我哋一家六口，兄弟姊妹都對間大牌檔好有歸屬感、好有感情，我呢，就最唔鍾意人詆毀『大牌檔』呢三個字。」
「畀番啲尊嚴大牌檔，唔好亂咁叨光。」小曾吸口煙，認真地說：「無冷氣、喺街邊開枱擺檔，先稱得上正宗『大牌檔』！香港好怪，嗰啲甚麼街市二樓熟食中心，擺幾張摺櫈、擺把牛角扇就話係大牌檔，上得樓、有瓦遮頭，咁都算呀？大陸重衰，街邊檔叫飯店、酒家，入舖嘅反而叫大牌檔，不知所謂，不倫不類……」
店名：強記大牌檔（27762712）
地址：深水埗石硤尾耀東街4號牌大牌檔 營業時間：6:00pm至4:00am
響朵之作，陳豪至愛。新鮮蝦仁先醃製，用茄汁埋芡，別忘與伴碟的蛋絲一併吃，很彈牙。
勁辣，何解？小曾說：「茄子比瀨尿蝦更適合避風塘煮法，瀨尿蝦淨係辣喺個殼度，茄子就唔同呢，易入味更加辣。」荷葉包田雞，古法炮製，加紅棗、百合、肉絲、冬菇絲入竹籠蒸熟，去泥味，令田雞更滑口。
小曾說：「下欄嘢，睇你點整，識整一樣好味。」工夫多多，先混和魚腸、雞蛋、油炸鬼，蒸至半生熟，稍稍放涼，最後連乞兒缽落鑊一併炸，外層金黃香脆，內餡嫩滑，日賣50缽。
小曾最耍家的一道菜：「啫啫雞煲，邊個唔識做啫，但好味就必定要夠鑊氣，同埋要識得調校落酒份量。」小曾自豪地說：「我煮嘅啫啫雞，未見過有人食剩喎。」
夫妻檔，老闆叫四哥，半開玩笑地說：「老竇排第四，所以叫陳泗記，到我呢代，六兄弟姊妹，我又排第四，老竇指定要老四繼承檔嘢喎，一捱就二十年，真係辛苦命。」隨時代淘汰，閣麟街附近高峯期有20檔大牌檔，現時只剩5檔：「以前閣麟街無馬路，𠵱家啲車泊到周圍都係；以前多碼頭咕喱幫襯，𠵱家反而多西裝友；以前乜都平，𠵱家牌費都成三皮幾一年……總之就辛苦命。」
「無話辛唔辛苦命嘅……」老闆娘順理成章叫四嫂，溫柔地笑：「我哋係街頭第一檔，生意總好過其他檔口多多聲，重怨啲乜？」結婚20年，多得一檔陳泗記，雖日做夜做，生活淡如水，卻養活一家大小，現在女兒有穩定的工作，兒子也在新西蘭留學，快將畢業：「得閒對仔女都會落場幫吓手，佢哋貪得意過吓癮咋，旨意佢哋開檔，餓死都得咯。」笑得很甜、很幸福。
單是梅菜已花盡心思，四哥說：「甜梅菜陣鹹味太假，唔用，我用鹹梅菜，先浸水，之後再炒，炒完同燒腩肉一齊燜，咁先夠味。」
沒說謊，調味架只得油、鹽、糖、南乳，四嫂說：「我一食味精就皮膚敏感。」紹興滑雞煲是她的撚手小菜，絕對無添加味精，何謂好餸？「食完唔覺口渴，咪好嘢囉。」
南乳純為吊味，雜菜有甚麼菜就放甚麼菜，精華盡在湯底，四嫂解畫：「我用新鮮雞殼、鴨殼熬幾粒鐘做湯底，出面啲味精水點及我啖湯咁甜。」
「睇雜誌介紹，經過咪順便試吓囉，呢度嘅咖喱雞、豉汁排骨幾好味吖。」
店名：陳泗記（25452834）
地址：中環士丹利街74號對面第1檔
營業時間：11:00am至11:00pm（隔周日休息，今日照常營業）
街邊「牌」「排」坐
說現時，較具規模的露天大牌檔多集中在深水埗、廟街、中環、旺角一帶；話當年，但凡大牌檔林立的街道，統統稱為「為食街」，因為這些街邊檔提供的食物價廉物美，選擇又多，加上鑊氣夠，飄來的陣陣香味，最吸引「為食」的勞苦大眾。
「大牌檔」三字，亦有典故在，原來據香港法例規定，食店必須設洗手間才獲發經營牌照，二次大戰後，政府破例發牌照予受傷或殉職的公務員家屬，准其經營小本食肆，但大牌檔因不置洗手間，不符合「食店」性質，故發放的牌照面積比食店大數倍，以資識別，稱作「大牌」檔，倒也名副其實。「大牌」檔為何又稱「大排」檔？有二說。一說是筆誤，一說這些沒有固定門面但又獲經營權的街邊檔愈開愈多，為免擠迫，一排又一排的枱櫈要一字排開，所以就叫「大排」檔。