甚麼是Beyond？有人說Beyond代表憤怒與敢言，他們則異口同聲說：「Beyond係宣揚和平，關懷別人，其實我哋只係用直接嘅講法，我哋唔識做人，但對自己無悔，我哋有自己嘅態度，好有禮貌㗎，我哋唔係宣揚暴力。」
Beyond在人生與處事上，很有自己的一套，對於時下樂壇常被評不健康，偶像歌手又被指教壞細路。Beyond就一針見血地道破，家強說：「香港樂壇冇乜改變，重衰咗少少㖭，我覺得個病重咗，以前啲人唱歌有實力，但𠵱家啲歌手錄歌就靠機器幫。」
阿Paul搭口說：「搵三十個女仔着三點式圍住你跳舞，唔信你唔睇呀。」家強和阿Paul又一人一句地說：「好多人都唔需要有靈魂嘅嘢，但唔好一窩蜂，有啲人都鍾意啲歌有feel啲㗎，有啲人又只求啲歌用嚟搵快錢，冇藝術可言。」
阿Paul說：「樂壇根本就原地踏步，唔只歌手，媒體都係，以前嘅病𠵱家重繼續病緊，不過以前就胃潰瘍，𠵱家就胃發炎啫。」家強又說：「𠵱家啲樂評都不知所謂，吹捧啲卡拉OK歌手，點會成氣候㗎。人哋話hit，佢哋就話hit，吹捧咗啲卡拉OK歌手出嚟，有乜好？啲新一代唔會睇吓呢啲所謂嘅明星有冇思想，身為香港人真係好失望。」
講到樂壇出現職業歌迷為新人造勢，家強及阿Paul更毫不客氣地說：「你講呢啲直情係癌細胞㖭啦，唔知係咪多咗啲人有錢冇碇使，啲社會現象咁奇怪嘅，以前啲人就鍾意新人出嚟禾稈冚珍珠，𠵱家就多咗好多暴發戶。」
Beyond覺得樂壇現象如此怪異，原因只為香港有個蠢政府，阿Paul說：「點解會有呢啲咁嘅歌手出現，因為啲人蠢，盲目崇拜，又冇好好管教仔女，點解會有蠢家長呀？因為有蠢制度，點解會有蠢制度呀？因為有個蠢政府囉。」
提起政府，家強不禁有點𤷪𤺧地說：「條吐露港拆晒啲隔聲板落嚟，你話蠢唔蠢呀？有人話起就起，啲人話要拆佢就拆，嗰度講緊幾億㗎，勞民傷財，個政府咁都唔叫蠢？」
阿Paul更譏財爺梁錦松買車一事，他冷笑道：「啲人為嗰幾蚊俾人講，真係唔抵，貪係有道理嘅，人之常情呀。」
Beyond說：「呢啲係反映佢嘅能力有限，我哋最擔心嘅只係香港會俾啲冇智慧嘅人話事咋。」