美國佬終於展開所謂嘅「伊拉克自由」行動。班大戶精心部署咗好耐，就係為咗等呢一刻嘅挾倉大行動，喺上個禮拜三同禮拜四，夾到班散戶個個舉晒手投降。伏勝最初睇到都唔係好信，周三下晝個市一開出嚟，期指竟然可以喺5分鐘內被夾高成百點，嚇到班沽空咗嘅散戶雞飛狗走，個情景同美軍用巡航導彈炸伊拉克無乜分別。
講起挾倉就唔可以唔提吓隻海爾中建（1169），隻股喺上星期五單日被挾高兩成八，最高見0.249元。
今次升得咁爽，傳聞係因為中建（138）麥老闆肯出售手上海爾中建股份，重話有個同海爾有友好關係嘅中方人士親自出面同麥老闆傾，話要買晒中建手上嘅股份，麥老闆開出嘅條件係要用一個好高嘅價嚟接晒佢手頭上嘅貨先至有偈傾。
雖然話係中建手上只係揸住海爾中建四成三股份，但批貨以上周五收市價0.242元計，起碼值8億銀，如果買晒中建手上嘅四成三股份，重要做多一鑊全面收購建議，要攞多成4億銀出嚟。要咁多銀嚟買起隻嘢，成唔成事不得而知，不過個市一於好少理，最緊要有消息炒，有班大戶出嚟話叫人跟住佢，重話會見5毫㖭。嘩！真唔真呀？
啱啱公布盈利上升達兩倍六嘅唯冠國際（334），喺上周五升咗7個巴仙，有朋友叫伏勝要對隻股多加留意，皆因業績公布後，開始有好多芬佬買盤入市，話呢排買藍籌風險太大，買番啲有盈利前景嘅工業股好過。聽行家話，有幾個大牌經紀喺上個禮拜五好似唔理價咁買隻股，話分分鐘有機會見番1蚊樓上。
伏勝