香港呢排俾非典型肺炎搞到人心惶惶，衞生福利及食物局局長楊永強都算係企喺好前線，幾次去重災區沙田威院了解情況。佢噚日上電台《鋒煙》節目，透露咗佢喺十年內先後同兩種棘手病症交手，除咗非典型肺炎外，就係有「世紀絕症」之稱嘅愛滋病。
原來楊醫生早喺八三、八四年，就開始醫治香港嘅愛滋病人，佢好自豪話自己係本港第一個醫愛滋病人嘅醫生，嗰時愛滋病非常神秘兼恐怖，人人都知係無藥醫。佢話，當時好想有一隊醫生幫手，但其他人好驚，所以幾乎要孤軍作戰。
佢話做得醫生，都有心理準備成日接觸唔同病菌，風險好大，過去亦有醫護人員因同病人接觸而染病。佢讚賞香港嘅醫護人員專業水準好高，要向患病同仍然工作嘅前線醫護人員致敬。
傳真︰2623-9278
電郵︰