一向敢言的Beyond，每次訪問的話題都離不開逝世多年的黃家駒，今年五月舉行的Beyond二十周年演唱會上，三子更會主唱家駒未曝光遺作《抗戰二十年》。而面對香港樂壇恒常的病態，Beyond更忍不住大罵愚蠢政府炮製出低水準歌迷，最愛K歌的香港人，會否覺得不中聽？
樂隊Beyond主音歌手黃家駒在日本意外跌死，轉瞬間已是十年前的事，其胞弟黃家強、兩位少年時代好友黃貫中（Paul）及葉世榮，心情也由當年的錐心之痛，變成今天的平靜，畢竟，時間始終是治療傷痛的最佳藥物。
提起家駒，Beyond三子在言談間也不禁流露一絲欷歔，家強先開口說：「喺我心目中，佢已經轉世，我個心平靜咗好多，早幾年我一直感覺佢喺附近，但近呢兩、三年，佢唔再留戀喺度，佢能夠忘記呢個世界，我都安樂好多。」
在旁的阿Paul和世榮也點點頭，同意家強的說法，阿Paul說：「到咗某個階段，佢唔走會好辛苦，我哋一路以嚟都諗好多，我哋又掛住佢，佢又唔走住，𠵱家就冇咁強烈。我哋周不時都會提起佢，有時又會睇到佢介紹要睇嘅碟，佢鍾意食嘅豬手麵，其實可以話佢一直都存在喺我哋生活之間。」
雖然Beyond與家駒陰陽相隔，但在今年五月Beyond假紅館舉行的二十周年演唱會上，三子仍會想盡辦法與家駒合唱，Beyond說：「我哋可能會用電腦虛擬效果，亦都可能會搵人扮，有好多方法都諗緊。」演唱會中，另一個驚喜就是Beyond從以前簽約的日本唱片公司手上，取回家駒未發表遺作，屆時Beyond便會唱出這首珍貴的作品。
世榮說：「我哋𠵱家已經搵緊人為呢首歌填詞，歌名暫時叫《抗戰二十年》，會講番Beyond為咗理想，經歷過嘅辛苦同難關。」同時Beyond亦會剪輯以往四子的台前幕後精華片段在個唱中播出，阿Paul不禁笑說：「咁多年嚟，我哋拍過特輯、電視劇同電影，重扮過四大天王隔籬啲天神㖭，一隊樂隊要玩咁多嘢先可以生存，都算有血有淚。」
Beyond的血和淚其實沒有白流，因為二十年來，未有一隊樂隊能取代Beyond的地位，但阿Paul卻抿着嘴說：「兩面嘅，好傷心㗎，成個花園得一朵花，你話靚唔靚啦？希望啲人畀心機，做吓音樂已經好開心。」
撰文：朱芷瑩
攝影：陳慧安
化妝：Andy
髮型：Stone
