影視界當紅小生羅嘉良，向來對汽車甚有研究，亦曾先後擁有多款歐日名車作座駕；而今回佢選購呢部畀太太使用嘅標緻307SW，則以家庭七人MPV作賣點。咁究竟撈家（羅之暱稱）對部車有何評價呢？大家不妨一齊嚟睇吓。
記者、攝影：黃凱穎
「其實買車前，我都無乜點話認真去睇過車，但有一日太太突然攞咗份標緻307SWCatalogue畀我睇，我直覺上覺得部車外形唔錯，加上比起太太用緊嘅豐田Rav4，更適合一家人外出之用，所以只係考慮咗兩日，我就買咗佢畀太太喇！」撈家說。另外，佢又覺得部車嘅造型好有時代感，尤其係一對頭燈組合，響芸芸同級車中可算係最搶眼嘅一部；而車頂鋁合金行李架雖未能大派用場，但勝在能夠令外形更好看。
標緻307SW車廂布局又畀到撈家有何感覺呢？「簡直可以用一個大字來形容，始終佢係一部家庭式七人MPV，用上高級真皮鑲嵌而成嘅三排獨立座椅，好坐又舒服，中、後排重可以獨立拆走，最啱同仔仔去郊外玩時作休息之用，甚至令尾廂空間增大，方便擺放行李或者其他用品；重有呀！尾門開啟幅度又夠大，攞放喺尾廂嘅嘢都不知幾方便！」
當被問及車子有何缺點時，撈家笑說：「因為部車鋼水好、夠硬淨，但因而令到車重增加，起步嗰陣或會令人覺得部車無力；但若果用作日常代步的話，307SW呢台2.0公升引擎其實都好稱職㗎！」但撈家就覺得一套轉檔順滑流暢嘅4前速Tiptronic半自動波，會是車子嘅可取之處。另外，佢略嫌一套原廠音響，若將音量調校至10度時，門壁就可能會因為揚聲器強烈震動而出現些許雜音，若廠方能針對呢個弱點作出適當改良，相信效果會更好。
「其實，我好鍾意揸開篷車嗰種好Free、好自在嘅感覺，所以如果得我自己一個用車的話，我會揀部開篷車；不過，開篷車唔係太適合一家大細乘坐，而307SW嘅天幕式車頂設計，亦能夠畀到人有類似駕駛開篷車嘅感覺，家陣就連我太太同仔仔都好鍾意個天窗。當我太太揸住呢部車載仔仔出街嗰陣，仔仔會好乖咁坐喺度觀賞天窗外嘅景色，因為小朋友係好鍾意望住天空嗰種感覺嘛！」撈家笑着說。
當提及天幕式車頂設計時，撈家就已經急不及待向筆者解釋，車子本身呢個天幕式車頂設計，係需要剛性極高嘅車架配合才可，因為由前擋風玻璃開始至到車身後方，響天窗及擋風玻璃接合處，都要有極好嘅技術同車架才可做到；而闊大擋風玻璃設計，亦畀到駕駛者有廣闊視野範圍呢！
自標緻代理於2001年下半年引入全新307車系後，於去年中又再引入走家庭MPV路線嘅307SW；新車除造型具有307車系原來嗰份誘人魅力外，闊落車廂空間亦能令乘客坐得好舒服，而天幕式車頂設計重係佢嘅賣點之一㖭！一台2.0公升直4DOHC偈重有充裕動力輸出，配合上一套4前速Tiptronic半自動波箱，除予人有駕駛自動波車嘅方便外，重可以有駕駛手波車嘅樂趣呢！
引擎：1997cc直4DOHC
馬力：138ps/6000rpm
扭力：19.4kgm/4100rpm
尺碼：4419×1757×1544mm
軸距：2708mm；車重：1391kg
新車售價：$189,900起
查詢：靈獅汽車（28663000）