早排以聯合國兒童基金會國際青年特使身份，去新疆做探訪嘅黎明，唔知係咪好耐冇去蒲吧嘅關係，所以一返香港就即刻去蒲。
過去黎明多數等到深夜時分先至出動，但前日傍晚黎明已經出現跑馬地happyhour，不過陪黎明飲酒嘅唔係舒淇，而係佢助手子泉同司機阿B。
前日傍晚六點半左右，馮仁昭見黎明部寶馬停咗喺跑馬地源遠街，唔使多講，黎明梗係去咗佢最鍾意嗰間Alfred'sCorner飲酒。果然不出所料，大概一個鐘頭後，黎明同子泉以及阿B一齊離開Alfred'sCorner，而間餐廳嘅女侍應重好熱情咁送黎明出門口。
馮仁昭見黎明臉紅紅，相信佢飲咗唔少，好在黎明有司機接載離開，飲幾多都冇有怕啦。
孫佳君同老友記電影公司老闆伍健雄傳緋聞，噚日佢喺上環拍攝新片《某年某月某日》，伍健雄亦有監場，合照時伍健雄搭住孫佳君香肩，但唔知點解孫佳君不停打噴嚏。孫佳君話：「我同雄仔只係普通朋友，我唔係佢鍾意嗰種女仔。伍健雄就話：「我想開部情慾戲畀佢（指孫佳君），要激過電影《殺手阿一》，但佢唔肯拍。」
麥浚龍（Juno）噚日喺鰂魚涌再舉行生日會，慶祝十九歲生日，佢同歌迷都玩得好開心，Juno話：「我都同歌迷慶祝咗五次生日，佢哋送咗好多禮物畀我。」噚日嘅生日會，歌迷為親近Juno，情況一度混亂，其中有歌迷重整傷腳，Juno知道都有啲肉痛。
鄭中基噚日接受商台《神州大地小儀國》主持訪問時，講到收fans嘅禮物中，最名貴嘅就係水晶小提琴同結他，佢重好語重心長話希望fans有心得嘞，無謂嘥錢。講到美伊戰爭，佢話都好擔心，因為媽咪同妹妹住喺美國，而爹哋鄭東漢下星期會去紐約開會。其實佢有叫鄭東漢改期，但機會就好微。
洪天明噚日去沙田出席「惠而浦夏日大比拼」活動時，話下個月要去日本拍攝數碼電影，而且會同田中裕子合作。天明嘅後母高麗虹𠵱家喺美國，佢話：「我聽到打仗都好擔心，不過媽咪同細妹都唔係住巿中心，我哋每日都唔止通一次電話，我覺得伊拉克平民好無辜。」
