法國球星皮利斯近日就打正旗號高呼反戰。呢位政治意識不嬲好強嘅阿仙奴中場，講明會叫埋兵工廠幾個法國隊友支持佢，甚至不惜罷踢以示反戰決心。估計班法國佬今晚對愛華頓可能有搞作，到時睇兵工廠球迷嘅反應，就知部份倫敦球迷對戰爭嘅立場嘞。
我求大俠估計，如果班法國佬今晚入到波，可能冒住被罰錢嘅危機除波衫，響衞衣度露啲反戰標語。雖然英國政府出兵打伊拉克，但其實唔少英國佬都反戰，加埋呢班法國佬係阿仙奴球迷寵兒，相信任何反戰動作都會獲得掌聲。
𠵱家最憂心嘅一定係兵工廠領隊雲格，話晒𠵱家係隊波爭雙料冠軍嘅重要關頭，就算球員唔罷踢，分心搞反戰都唔係好事。
愛華頓餘下幾場波會對幾支強隊，包括榜首雙雄阿仙奴同埋曼聯，可以話係攔路虎。佢哋龍門李察胡禮重講明聯賽冠軍誰屬，可能掌握響佢雙手中。我求大俠記得佢係阿仙奴棄將，梗有啲唔開心，唔知佢會唔會對曼聯時特登手鬆啲，等阿仙奴連聯賽冠軍都無埋呢？
上個禮拜國米對利華古遜場歐冠盃，韋利雖停賽但賽前重想隨隊練習。不過教練古柏規定唔畀停賽球員隨隊。據講兩人因此不和，搞到會長摩拉堤要走出嚟澄清。古柏堅守原則無錯，之但係經常同大牌球星衝突，舊年就有朗拿度唔妥佢，希望今年唔會輪到韋利啦。
些路迪殺入歐洲足協盃四強，帶挈蘇格蘭響歐洲足協排名榜升上第九位，令蘇超聯冠軍隊喺○四至○五年球季唔使踢外圍賽，直入歐冠盃分組賽。消息一出，連視些路迪死敵嘅流浪都拍掌叫好，讚些路迪好波。冇人知下季邊隊攞冠軍踢到再下一季歐冠盃，話唔定些路迪播種，流浪取收成喎。
原來足總安排咗嚟香港踢亞洲盃預賽嘅老撾、孟加拉同港隊入住太子「京港」，撞啱附近嘅「京華國際」被醫管局點出嚟係非典型肺炎嘅源頭，足總見風頭火勢，立即安排三軍轉住每間房貴四、五百蚊嘅尖東帝苑，環境同嗰區空氣質素好好多；我求大俠覺得足總識得大局為重，抵讚。
噚日梳打埠莊家將原先東岸一哥活塞作客讓紐約人一分半嘅盤口，臨場改為紐約人反讓兩分。活塞啱啱大炒76人，相信今鋪重好多人覺得筍盤當前。點知活塞最後竟然以四分輸咗畀紐約人。事後check番先至發現原來紐約人喺一月中以來，加埋今次，主場對過九支東岸球隊從未輸過盤。今次如果唔做功課，實上晒莊家當囉！