八六年於任內逝世嘅港督尤德爵士真可謂遺愛人間，由八七年開始每年都於香港頒發嘅「尤德爵士紀念基金獎學金」，唔經唔覺，已經頒獎咗一億三千幾萬，受惠學生超過三十萬。噚日尤德夫人特登由英國飛來香港，同基金信託委員會主席陳祖澤、理事會主席夏佳理一齊頒獎。
尤德爵士基金同香港政府一樣，面對財赤威脅，總資產一億三千萬比前年減少一成，收入亦由前年嘅七百幾萬減到五百幾萬。不過比起要一筆過減大學經費一成嘅政府，基金慷慨得多，今年仍發千二萬獎學金，一個仙都無減，咁先叫「投資教育絕不手軟」。
其實基金有馬會主席夏佳理做理事會主席，就算使突些少，馬會睇怕都會幫幫忙啩。夏佳理噚日講到賭波進展，一副成竹在胸嘅樣子，話同政府已經傾到七七八八。不過講到要喺電話投注前播警告聲帶，佢就暗示咁做好唔實際。
（圖）尤德夫人（中）同夏佳理（右）傾得咁開心，做乜唔預陳祖澤呀？
傳真︰2623-9278
電郵︰