列斯領隊雲拿保斯因為喺星期四晚同列斯董事局開會時吵嘢，結果劈炮唔撈。多份英國報章都對雲拿保斯感到可惜，又話佢當年做過巴塞隆拿教練，又帶領過英格蘭國家隊，今次咁樣上咗列斯架賊船，衰收尾認真唔抵。
不過，我求大俠就唔同意呢啲英國報紙嘅睇法，雲拿保斯接手列斯前都知隊波負債勁，會長列斯杜爾要賣走好多大牌球星先至肯畀佢簽新星㗎啦，但係佢依然願意為列斯掌帥；另外，從佢今屆帶領列斯嚟睇，雲拿保斯嘅板斧唔多，列斯喺榜中下游沉淪佢唔多唔少都要負責。
列斯喺咁嘅時候搞單咁嘅嘢，撞啱星期日重要硬撼利物浦，認真牙煙，因為利物浦啱啱喺歐洲足協盃出局；加上佢哋為咗力爭下屆歐冠盃參賽資格，呢場一定去盡，但如果列斯再輸埋呢場，就可能捲入降班漩渦喇！
受到美伊大戰影響，唔多唔少影響到效力卡塔爾艾沙德嘅羅馬里奧。咪以為我求大俠擔心呢個前巴西國腳，原來佢同艾沙德上個月簽約時訂明，一旦開戰佢就有權即刻較腳，聽講重可以白𢭃埋其餘人工㖭。唔使做有錢收，真係橫財從天降，攞埋錢咪鬆人囉。
祖雲達斯入咗歐冠盃八強後，據報進帳近一千萬歐元（約八千二百六十萬港元），聽聞會方即刻準備買埋中場甘莫蘭尼斯另一半擁有權，重會加到八萬歐元周薪。羅馬就慘，佢哋因為踢唔到下屆歐冠盃，阿積士嘅伊巴謙莫域即刻耍手擰頭話唔肯過檔，真現實。
英格蘭球隊傳統上一直壓住蘇格蘭球隊，所以利物浦響足協盃俾些路迪踢出局，都咪話唔瘀。四強中，估唔到重有兩支葡萄牙球隊，引證呢個真係「騎呢」盃賽。𠵱家拉素響四強牌面上獨大，唔知教練文仙尼知道利記出局時有無偷笑呢？
利物浦前晚輸畀些路迪○比二，第一球失得幾核突，事關「人牆」謝拉特喺阿倫湯臣射罰球時跳起，個波穿過佢腳底入網。利記喺兩年對艾拉維斯場歐協盃決賽都試過咁失波，估唔到歷史重演。德國喺九四世界盃對保加利亞，攝記影到佢道人牆喺對手射罰球時跳起，當時教練福士事後逐個抦，睇嚟侯利亞要學下福士咁做至得。
唔知係咪我求大俠敏感，睇到前晚甲Ａ大連實德對上海申花，王聖擺烏龍嗰球波，硬係有啲「假」。𠵱家梳打埠有開甲Ａ盤，聽日有場四川冠城對深圳健力寶，四川球員就話有乜理由佢哋主場要受讓咁羞家，我即管睇吓你開唔開得成下盤。
逢周六、日見報