在香港大學修讀法律課程嘅梁珮瑚，最近被傳有咗四個月身孕，雖然梁珮瑚早幾日出席慧妍雅集活動時，口口聲聲否認，重話𠵱家只係有一個拍拖九個月嘅男朋友，對方亦曾經同佢求過婚，佢重話因為近排要應付考試，冇時間做運動，先至搞到咁肥，不過睇佢腹部隆起同腳粗粗嘅迹象，就真係十足十大肚婆咁嘅款。
而噚日凌晨一點左右，馮仁昭喺跑馬地又撞見梁珮瑚，佢同才女梁芷珊以及兩位女性朋友去咗酒吧飲嘢，逗留咗一陣就走人。
有記者問梁珮瑚係咪大肚，雖然佢又繼續否認，但就邊講邊用件羽絨遮住自己個肚，咁做法簡直係無私顯見私！
而最搞笑嘅係同佢一齊嘅梁芷珊，佢見到梁珮瑚俾成班人圍住影相嘅時候，猛咁提住佢叫佢小心啲，觀乎梁芷珊咁緊張嘅表現，想叫人唔信梁珮瑚有咗都幾難啦！
丘凱敏（Anna）噚日喺西貢為路訊通拍攝節目《香港樂悠遊》，介紹西貢區吃喝玩樂之處。Anna話除咗鍾意西貢區嘅海鮮外，嗰度嘅小食同甜品都好出名。Anna重話除咗識食外，煮嘢食都好拿手，最叻就係整咕嚕肉同粟米肉粒，試過嘅人都讚不絕口。
許志安噚日接受商台節目訪問，主持人搵咗安仔嘅家姐同舊同學講吓安仔嘅為人，不過就冇搵安仔嘅緋聞女友鄭秀文，原因係怕安仔嬲。問安仔佢首新歌《安歌之歌》有借鄭秀文過橋之嫌，安仔話：「第一，唔係我教填詞人寫，第二，首歌幾有意思，話我借佢過橋就到時先講啦。」
有傳黃夏蕙噚日中午喺紅館場外，將《東方歌藝園》嘅免費飛喺街頭兜售，記者噚晚喺紅館場外向黃夏蕙求證，佢就否認話：「其實係啲朋友搵我買飛，結果白韻琴佢哋甩底，我要周圍搵人買番啲飛，後來有人要咪派畀人囉，𠵱家重俾人話我炒黃牛飛，真係無辜。」
陳冠希噚日喺商台出現，問佢知唔知緋聞女友張栢芝公開話要同傳媒修好關係？陳冠希話：「咁咪好囉，佢諗通，兩邊都唔使鬧交，佢之前見記者都好唔開心，但係藝人係要面對記者，𠵱家佢去食嘢、去玩都好啲。」
關心妍噚日接受商台節目訪問，講到近日美伊開戰，佢話原本五月會去美國登台，但𠵱家可能因安全問題而取消，關心妍話：「都幾失望，因為今次機會好難得，我出道一年登台就有成六位數字酬金，新人嚟講都算好好。不過我媽咪都叫我唔好去，我諗都要同公司再傾吓。」
