做過今次荃灣區專題後，先知道原來荃灣都係一個扮靚嘅好去處。首先必到嘅有水晶Tee專門店，之後再去買充滿HeavyMetal氣息嘅Boot同銀器扮Rock友，重有平過旺角價嘅波鞋，壓軸再到勁旺勁爆嘅全女班髮型屋剪個靚髮；呢個又抵又特別嘅荃灣扮靚消費遊，絕對滿足又難忘。
採訪當日係星期二下午三點，估唔到呢個時間Salon內都有咁多客人幫襯。原來全靠九位女髮型師撐場，當中最年輕只有19歲，各有強項應付不同年齡層面嘅客人，加上全女班這噱頭，難怪平日都咁好生意。
容易溝通
「當初有全女班髮型師這概念，係因為覺得同女仔客會易溝通啲，會更明白客人需要，但原來男客一樣鍾意搵女髮型師，因為不少男客人最緊張嘅都係女仔點睇佢哋個髮型，咁呢方面我哋就可以畀到好多意見。」
8年前開舖已在陣嘅Moon更話由於大家都係女仔，成間Salon嘅員工相處得更融洽，做得開心都係推動力之一。
至於有冇男客貪有靚女髮型師，而有所企圖地幫襯，乘機撩吓女仔，Moon就話：「啲男仔客大多數都好怕羞，我哋撩佢哋多啲喎。」睇嚟呢間Salon咁受客人歡迎，真係絕對有理由。
客仔有乜講
重點髮型工作室（24115129）
地址：荃灣華都商場1樓44號舖
營業時間：10:45am-9:00pm
洗剪恤一般收費：$88
抵買正貨
催運嘅水晶近年極度流行，荃灣又點少得呢類店舖。呢間名為「緣」嘅水晶店，除咗有各種催運水晶售賣外，有一半舖位係用嚟賣水晶圖案Tee，以正宗SWAROVSKI水晶砌出不同圖案，再用極高溫熨上衫身，夠晒閃之餘重好耐用，用洗衣機洗啲水晶都唔會甩。如果睇唔啱圖案，重可以自己帶Tee嚟印水晶上去。
緣（24164488）
地址：南豐中心2樓50號舖
營業時間：12:30pm-9:30pm
MetalWear喺荃灣屹立咗十三年，主打英國品牌ALCHAMY嘅HeavyMetal飾物，另外亦有充滿Rock味嘅長Boot、皮帶等售賣。老闆楊先生話由於十多年前香港重未太流行HeavyMetal打扮，MetalWear可以話係荃灣、甚至全港少有嘅HeavyMetal專門店，當年不少客人慕名而來，當中還包括最愛皮褸皮褲Rock味打扮嘅許冠英。
MetalWear（24110772）
地址：荃豐中心2樓C21-22號舖
營業時間：12:30pm-9:00pm
原來有好多荃灣居民都叫川龍街做荃灣波鞋街，一條街內有差不多十間鞋舖，波鞋、皮鞋都有得買，而經格價後，發現當中有間叫幸運公司嘅波鞋舖，有啲波鞋比旺角波鞋街重平。
幸運公司（24929362）
地址：川龍街41號地下
營業時間：10:00am-10:00pm
舊區情懷
三棟屋係早在十八世紀興建嘅客家圍村，博物館保留初建成的基本結構，更係香港歷史最悠久的圍村及政府法定古迹之一。
三棟屋博物館（24112001）
地址：荃灣古屋里二號
開放時間：星期一、三至日(包括公眾假期)9:00am-5:00pm；星期二休息
在芙蓉山半山及老圍路一帶嘅寺廟，亦係荃灣出名的觀光祈福勝地，當中包括圓玄學園、西方寺及竹林襌院等。
圓玄學院（24922220）
地址：荃灣三疊潭
開放時間：8:30am-5:00pm
交通：可在荃灣地鐵站(兆和街)乘81號專線小巴到老圍總站
已有二十多年歷史的鐵皮屋小販市場，內裏有賣布、改衫、賣雜貨的小店舖，通道像迷宮一樣，極有懷舊風味。
地址：荃灣川龍街