香港政壇亂作一團，立法會議員公審阿松，行政會議成員放料，違反集體保密制之際，我哋董特首不見踪影，聽講係上京出席人大會議閉幕禮，見吓新領導人喎，希望佢能把握機會，向胡錦濤、溫家寶呢類專家學番一兩招，管治香港都醒神啲。
呢晚去到一個文化聚會，聽吓大教授講解宋詞，甚麼是：「二八花鈿，胸前如雪臉如蓮，耳墜金環穿瑟瑟，霞衣窄，笑倚江頭招遠客。」大教授唔講，左丁山重以為詞中美女，係指中環尖沙嘴日日見到着bratop露肚臍嘅美少女，乜宋朝時候，靚女已經俾詞人睇到「胸前如雪」咁前衞？大教授演講之前，碰到唔少賓客，其中一位來自遠方嘅經濟學名家，喺國際學術界，名氣唔會差過張五常。呢位名家近幾十年來先到台灣，後到中國，為兩岸經濟發展獻計，左丁山問佢：「不如你為香港出吓聲，教吓路啦！」名家笑一笑：「Yougetbadleadershiphere!」左丁山當堂唔敢出聲，後來再問清楚：「你講特首？」名家話：「唔好賴晒佢，班高官都唔得吖！」
唉，香港形象如此，有冇得補救？個領袖做好啲得唔得呢？董先生俾人彈議而不決，佢能唔能夠學杜魯門，擺塊Thebuckstopshere嘅牌喺佢枱面？戴卓爾夫人啲內閣大臣，諸多口水，講到天花龍鳳，戴卓爾夫人講：「Idon'tmindhowmuchmyMinisterstalk,solongastheydowhatIsay.」大前提係戴卓爾夫人知道自己講乜，我哋嘅領袖可能唔知自己講乜噃。