非典型肺炎病毒源頭，來自旺角某酒店。當天一同乘搭電梯的幾個人，其中一位咳嗽，其餘乘客相繼中招，輾轉將病菌帶入醫院，擴散至前線醫護人員。帶病毒那位，稍後毒發身故。
你會不會問，天大地大，何必偏偏玩謝我？全港人頭湧湧，同坐一部電梯的，不是他而是你。遲一秒早一秒，都能避過新世紀變種病毒。偏偏湊巧，中六合彩未輪到你，但命運把幾個事前沒有關連的人安排在一起。只不過同坐一部lift，不是同坐一隻高危的飛機喎！結果，就出事。造物弄人，幾咁唔抵。
對比起美國出兵侵襲伊拉克，或許你會慶幸，這隻副黏液病毒，被不眠不休鍥而不捨做研究的醫科專家起清佢個底。亦即是說，它惡唔得幾耐。不似得美軍進犯下的伊拉克國境，人民一旦中毒，根本不知道應該埋怨哪一邊。美國和伊拉克都有使用化學毒氣作戰的前科，是戰場上出晒名的骯髒兵團。毒氣面罩，比N95口罩惡形惡相，希望香港永遠用不上，也不會出現面罩搶購潮。
香港冇戰事，但有病毒，病源源頭在哪裏？大家心照。要追究的話，恭請特首引領行會成員，盡早來個保密燒炭煲醋大行動，速戰速決！否則，唔該你班大帝自動落台！集體流亡！