唯冠國際（334）業績果然好靚仔，中期都賺成7328萬元，可算係喜出望外。
原本小初諗住班炒家可能會借好消息出貨，點知睇落又唔係，人哋有幾多就接幾多，股價以全日高位0.98元收市，大升7.69%。
唯冠噚日成交急增至1865萬元，莫非今次真係基金重投唯冠懷抱？可惜小初舊年已被嚇親急跳車，現時一股都冇喺手，空嗟嘆。
經紀陳安慰小初，話唔係你財唔入你袋，呢隻賺唔到錢可以吼過第二隻，好似向來炒味異常濃厚嘅冠軍科技（092），噚日公布業績亦唔差，現水平股價仍算偏低，唔排除下周一會借機炒一轉短線。
冠軍業績有增長，截至2002年12月底止嘅上半年度，賺成1.06億元，較上年同期升5.1%，派中期息1.6仙，亦較上年同期為多。
冠軍自從併股以來，股價一直偏低，近排股價先至造好啲，成交亦轉趨活躍。經紀陳上述所言，亦不無道理，可以小敲。
慕容小初