美伊戰爭爆發後，日本藝能界即時瀰漫着一股反戰氣氛，一向敢言的光頭影帝窪塚洋介，前日發表反戰言論時，痛斥美國總統布殊。
窪塚說：「布殊話『大家對我嘅理解有限，但實際上大家對呢件事睇得太單純』，但係我覺得歷史已叫我哋唔好再行呢條（戰爭）路，我唔理你係為咗打擊恐怖分子，定係為咗賺錢，我永遠都反對戰爭！」窪塚如此敢言，難怪韓國女歌手BoA前日在記者會上，表示最渴望窪塚是向她求婚的男人。
而日本歌姬宇多田光雖然早前曾與布殊會面，但她一樣嚴厲批判發起戰爭的人。繼前日在個人網頁內留言指贊成戰爭和對戰爭毫不關心的人同樣有罪後，昨日光妹又在網上發表文章，希望喚醒大眾關心戰爭，她說：「雖然獨裁者係唔可以放過，但假如我哋用想像力諗吓，如果我係伊拉克嘅女人會點？我知道改變一個政權可以改善生活，但當一家人走入防空洞途中，小朋友俾美軍嘅炮彈炸中，到時又可以怨邊個？」
資深影星吉永小百合前日出席一個公開場合時，亦甚為感慨地說：「我知道二次大戰嗰陣發生原爆嘅恐怖，所以只希望世界和平。」至於前日首度現身公開場合為演唱會DVD宣傳的日本女歌手Misia，則穿上一件寫有「NoWar（不要戰爭）」字眼的上衣，無聲表達反戰立場。