美國向伊拉克開火，港股算係反應平淡，窩輪市場未係殺戮戰場。10大成交金額窩輪，升幅最大嗰件都係升2.3%，跌幅最大嗰件亦只係跌3.5%，炒熱門輪者贏輸最多都係有限公司。成交金額較細嘅窩輪，自然有啲飛沙走石，亦有啲傷得好重。
海爾中建（1169）炒海爾注入白家電，彈升29%，公司輪873由3仙升上5仙，升幅67%，明年2月夠鐘，溢價136%，槓桿率4.8倍。行使價52仙，正股現價24.2仙，隻輪非常價外，買呢隻輪最後輸多過贏。
中海油（883）走勢同油價開玩笑，油價跌，股價則由10.05元升上10.25元，Call輪9737收73仙，升20%。今年8月到期，溢價10.5%，槓桿率14倍。咁嘅溢價，買唔過。
死火輪有隻恒地Call輪9576，昨日收11.1仙，大跌31%。隻輪下月中到期，溢價1.2%，槓桿率19.7倍。呢件有多少值博率，預咗輸晒去博（少少），萬一正股彈番上一兩蚊，隻輪好肥仔。
另1隻死火輪電盈Call輪9637，收2仙，散26%，有68球易手。行使價7.40元，正股（008）做緊4.80元，條件亦欠佳，好難升上行使價，9637始終都係死火，當然夠鐘前有升有跌好正常。
章盛